ԵՐԵՎԱՆ, 1 նոյեմբերի — Sputnik. Հայկական ՏՏ մասնագետները բարձր որակավորում ունեն, բայց հաքերային հարձակումների ժամանակ բացակայում են համախմբված գործողությունները: Այս մասին Sputnik Արմենիային տված հարցազրույցում ասաց տեղեկատվական անվտանգության հարցերի փորձագետ Սամվել Մարտիրոսյանը:
Իրավիճակն ընդհանուր առմամբ հիշեցնում է «Վայրի Արևմուտքը». նման իրավիճակներում հայ մասնագետների շարքում քաոս է տիրում, կարծում է Մարտիրոսյանը:
«Կասպերսկու լաբորատորիա» հակավիրուսային ընկերությունը Ռուսաստանի, Հայաստանի և Մալայզիայի բանկերի վրա նախօրեին նոր թիրախային կիբեռհարձակում է արձանագրել: Գրոհը ստացել է Silence անվանումը: Փորձագետները պարզել են, որ առաջին ալիքը եկել է դեռ 2017թ-ի հուլիսին և շարունակվում է մինչև հիմա:
Մարտիրոսյանի խոսքով՝ տեղեկություններ չկան` հայկական ֆինանսական հաստատություններն այդ հարձակման հետևանքով տուժել են, թե ոչ:
««Կասպերսկու լաբորատորիայի» նման ընկերությունները բավական հաճախ ֆիքսում են տարբեր կազմակերպությունների կամ պետական հաստատությունների վրա հարձակումները, բայց Հայաստանը նման իրավիճակներում շատ հազվադեպ է բարձրաձայնում այդ մասին», — ասաց փորձագետը:
Նրա խոսքով` Հայաստանում ընդունված չէ հաքերային հարձակումների մասին տեղեկություն հրապարակել, հատկապես եթե հարձակումն ուղղված է լինում ֆինանսական կազմակերպություններին:
Պատասխանելով հարցին, թե Հայաստանում պաշտպանվա՞ծ է արդյոք կորպորատիվ բիզնեսը վիրուսային հարձակումներից, մեդիափորձագետը նշեց, որ տվյալ դեպքում խոսքն այսպես կոչված թիրախային հարձակման մասին է, երբ հաքերները չեն սահմանափակվում լայն լսարանին վիրուսների և ֆիշինգային հաղորդագրություններ տարածելով, այլ աշխատում են կոնկրետ կազմակերպության դեմ:
«Այսինքն հաքերները երկար ժամանակ հետևում են տեղեկատվական հոսքերին, բացահայտում առավել խոցելի կետերը, խոցելի աշխատողներին և այլն: Նույնիսկ լավ պաշտպանված կազմակերպությունների համար բավական բարդ է դիմակայել այդ գրոհներին», — ասաց Մարտիրոսյանը:
Նա նշեց, որ Հայաստանը ապրիորի պաշտպանված է, քանի որ մեր կազմակերպություններից խոշոր «ավար» տանել չի հաջողվի. տանելու բան չկա: Բայց մյուս կողմից, ըստ փորձագետի, կիբեռհանցագործությունները նոր մասշտաբների են հասել:
«Դրա հետ կապված՝ չարագործներն արդեն հարձակվում են ոչ միայն խոշոր թիրախների, այլ նաև Հայաստանի նման փոքր երկրների վրա: Այդ առումով շատ բարդ է խոսել այն մասին, թե որքանով է մեզ մոտ ամեն ինչ պաշտպանված: Առաջին հերթին, մենք հարձակումների մասին տեղեկատվություն քիչ ունենք: Ոչ ոք չի բարձրաձայնում՝ ո՛չ իրավապահ մարմինները, ո՛չ մասնավոր ընկերությունները: Երկրորդ` երկրում չկան մասնագիտացված կազմակերպություններ, որոնք կզբաղվեին մոնիտորինգով, կպատրաստեին հաշվետվություններ երկրում տիրող իրավիճակի մասին: Այսինքն, Հայաստանում չկա համակարգող կենտրոն, որը կարող էր իրազեկել և հետազոտություններ անցկացնել», — ավելացրեց Sputnik Արմենիայի զրուցակիցը:
Փորձագետի կարծիքով՝ բավական բարդ է գնահատել, թե որքանով է Հայաստանը խոցելի՝ հաշվի առնելով այդ ամենը:
«Կան մասնագետներ, բայց ենթակառուցվածք չկա: Մեզ մոտ «Վայրի Արևմուտք» իրավիճակ է. երբ խառնաշփոթ էր տիրում, ինչ-որ մեկը հանցագործներին էր բռնում, մարշալներն իրենց գործերով էին զբաղվում, բայց միասնական համակարգ չկար», — նշեց Մարտիրոսյանը:
Նրա խոսքով՝ Silence հաքերային հարձակման յուրահատկությունն այն է, որ չարագործները գտնում են թիրախ, հսկում այն և այնուհետև գործընկերներին ուղարկում ֆիշինգային նամակներ:
Մարտիրոսյանը վստահեցրեց, որ նման գրոհներ կարող են կազմակերպել միայն ուսուցում անցած մասնագետները:
