00:22 23 նոյեմբերի 2017
Ուղիղ եթեր
Նորածին

Հրազդանում երեխային խեղդամահ արած մորը մեղադրանք է առաջադրվել

© Sputnik/ Asatur Yesayants
Հայաստան
Ստանալ կարճ հղումը
179 0 0

Հրազդանի բնակչուհուն մեղադրանք է առաջադրվել իր նորածին երեխային սպանելու համար։

ԵՐԵՎԱՆ, 14 նոյեմբերի–Sputnik. ՀՀ քննչական կոմիտեի Կոտայքի մարզային քննչական վարչությունում ավարտվել է նորածին երեխային սպանելու դեպքի առթիվ հարուցված քրեական գործի նախաքննությունը։

Մեղադրանք է առաջադրվել նորածնի մորը՝ մարզի 40-ամյա բնակչուհուն: Այդ մասին հայտնում է քննչական կոմիտեն։

2017թ. մայիսի 15-ին Հրազդան քաղաքի Շահումյան փողոցի թիվ 10 հասցեում գտնվող կանաչապատ հատվածում խոտերի վրա՝ թղթե արկղի մեջ, հայտնաբերվել է արական սեռի նորածին երեխայի դիակ՝ պոլիէթիլենային պարկով փաթաթված:

Նախնական քննությամբ ձեռնարկված անհրաժեշտ միջոցառումների արդյունքում բավարար տվյալներ են ձեռք բերվել, որ նորածինը մահացել է շնչահեղձության հետևանքով, պարզվել է մոր ինքնությունը։

Ըստ քննության տվյալների՝ 40-ամյա կինը 2017թ. մայիսի 11-ին՝ ժամը 10:00-ի սահմաններում, Հրազդան քաղաքի իր բնակարանում ՝ լոգարանում, առանց բժշկական միջամտության և որևէ մեկի օգնության, ծննդաբերել է արական սեռի երեխա: Այնուհետև նորածնին մեկ ժամից ավել թողել է լոգարանի զուգարանագոգի մեջ, որի հետևանքով շնչահեղձության պատճառով վերջինս մահացել է:

Մի քանի օր անց նորածնի դին, պոլիէթիլենային տոպրակի մեջ դրված, տեղափոխվել է Հրազդան քաղաքի Շահումյան փողոցին հարող անտառապատ տարածք, որտեղ էլ հայտնաբերվել է:

Ձեռք բերված բավարար ապացույցների հիման վրա 40-ամյա կնոջը մեղադրանք է առաջադրվել ՀՀ քրեական օրենսգրքի 106-րդ հոդվածի հատկանիշներով, նրա նկատմամբ որպես խափանման միջոց ընտրվել է ստորագրությամբ չհեռանալը:

Նախաքննությունն ավարտվել է, և քրեական գործը՝ մեղադրական եզրակացությամբ, ուղարկվել դատարան:

Գլխավոր թեմաներ