ԵՐԵՎԱՆ, 20 նոյեմբերի — Sputnik, Անի Լիպարիտյան. Հայերը նույնքան խիստ են, որքան ռուսները, սակայն փորձում են ավելի ջերմ լինել, ինչպես միջերկրածովյան բնակիչները։ Նրանք պետք է Եվրոպային ավելի մոտ լինեն, ասել է իսպանացի զբոսաշրջիկ Նավարո Բելոկին Sputnik Արմենիայի հետ հարցազրույցում։
Այսպիսի եզրակացության զբոսաշրջիկը հանգել է մեր երկրում տասնօրյա հանգիստ անցկացնելուց հետո։
«Տուրիստական գործակալությունում աշխատող ընկերներս առաջարկեցին ինձ Հայաստանով կամ Ուզբեկստանով ճանապարհորդել։ Ես ընտրեցի Հայասպանը, ուզում էի տեսնել վանքերը, թանգարանները, զբոսնել Երևանի փողոցներով», – ասաց Բելոկին։
Հետաքրքրասեր զբոսաշրջիկի Instagram–ի էջում կարելի է տեսնել Հայաստանում արված բազմաթիվ նկարներ։ Տեսարժան վայրերի թվում են Հաղպատ ու Սանահին վանքերը, Հաղարծինը, Գոշավանքը, խաչքարները, Դիլիջանի հին տնակները, Էջմիածինը, Զվարթնոցը և այլն։
Հայաստանի մարզերով շրջելիս` Նավարոն հասկացել է, որ հայերը երեք տեսակի են լինում. հիմնականում նրանք նման են միջերկրածովյան տարածքի բնակիչներին, ռուսներին ու արևելյան մարդկանց։
«Երևանի հաստատություններից մեկում ծանոթացա հիանալի մարդկանց հետ, նրանք պատմեցին, որ Հայաստան են եկել Սիրիայից… Ես շփվում եմ նաև Իսպանիայի հայերի հետ, ես Արմինա անունով մոտ ընկեր ունեն»,– պատմեց մադրիդցի զբոսաշրջիկը։
Նավարոն ծանոթ է նաև Իսպանիայի հայ համայնքին, ու ասում է, որ բնավորությամբ «իսպանական հայերը» նույնքան «խիստ են», որքան հայաստանցիները։
«Ես կսատարեմ Հայաստանին, եթե Եվրամիություն մտնելու հարց լինի», – հավելեց նա։
Հյուրին ուրախացրել է այն փաստը, որ զբոսաշրջությունը Հայաստանում զարգանում է։ Նա հավելել է, որ մեր երկրով ճանապարհորդելիս հանդիպել է միջին տարիքի իսպանացիների, որոնք հաճույքով շրջում էին տարբեր հայկական քաղաքներով։
Իսպանացին նաև հիացած էր հայ աղջիկների գեղեցկությամբ, նա նշեց, որ նրանք յուրահատուկ գեղեցկություն ու «ախորժալի» կազմվածք ունեն։