ԵՐԵՎԱՆ, 20 նոյեմբերի — Sputnik. Հայաստանի 2018 թվականի բյուջեն աշխատանքների ծրագիր է, ոչ թե գումարների ծախսեր, համոզված է Ազգային ժողովի ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը։
2018 թվականի բյուջեի նախագծում ծախսերի մոտ 52 տոկոսը ներկայացված է ոչ միայն ֆինանսական, այլև իրական ցուցանիշներով։
«Այսինքն կառավարությունը ցույց է տալիս ոչ միայն ծախսերը, այլև բացատրում է` ուր կգնան այդ գումարները և ինչի համար կծախսվեն»,- Sputnik Արմենիա մամուլի կենտրոնում կայացած ասուլիսի ժամանակ ասաց Մինասյանը։
Այդ պատճառով պետք չէ անհանգստանալ, որ սոցապահովության ծախսերը չեն աճում։ Գլխավորն այն չէ, թե որքան կծախսեն, այլ այն` որքան գործազուրկների կօգնեն զբաղվածության հարցում կամ որքան աշակերտներ կստանան անվճար դասագրքեր։
«Գլխավորը նպատակային ցուցանիշներն են, այլ ոչ թե սոսկ ծախսային հոդվածները. սա է ծրագրային բյուջետավորման հիմնական տրամաբանությունը։ Եթե կարողանաք նույն աշխատանքը կատարել քիչ ծախերով, ապա փառք ու պատիվ ձեզ»,- հայտարարեց Մինասյանը։
2018 թվականի բյուջեում կրթության ծախսերը նվազել են 0.6 տոկոսով, իսկ սոցիալական ապահովության ծախսերը` մոտավորապես 0,1 տոկոսով» Առողջապահության ոլորտի ծախսերը նախատեսվում է կրճատել 6.9 տոկոսով։ Պատգամավորը կարծում է, որ անհանգստանալու կարիք չկա։
«Այս կրճատումներում հանրությունը միանգամից նկատեց պետական սեկտորի կրճատումները։ Բայց չէ՞ որ առաջին հերթին կրճատել են օժանդակ աշխատակիցները, ոչ թե որակավորված մանկավարժներին ու ուսուցիչներին։ Նշանակում է` պետծառայությունների որակը չի տուժել»,- ասաց Մինասյանը։
Նա ավելացրեց` հենց այդպես` իրական, ոչ թե ձևական պետք է գնահատել բյուջեի ծախսերը։
