ԵՐԵՎԱՆ, 20 նոյեմբերի — Sputnik. Ծնողները մարզպետարանին փակուղի են տարել, ինչի արդյունքում մարզպետը մեկնել է Ջրարբի, հանդիպել ու լսել գյուղի բնակիչների պահանջները և խոստացել 10 օրվա ընթացքում դպրոցն ապահովել կենտրոնացված ջեռուցման համակարգով։
«Ծնողները հանդարտվել են, ասել են` վաղվանից երեխաները կգան դպրոց, 10-15 օրվա ընթացքում, եթե ջեռուցում չանցկացնեք, նորից ենք դասադուլ անելու»,– ասաց Սայադյանը և հավելեց. «Եթե մարզպետը խոստացել է, ուրեմն կանի»։
Մարզպետարանի ներկայացուցիչը մեզ հետ զրույցում հերքեց նաև ծնողների հայտարարություններն այն մասին, որ դպրոցի պատուհանները փակելու համար աշակերտներից պոլիէթիլենային թաղանթի գումար են հավաքում։
«Պոլիէթիլենային թաղանթները գնել է հենց ինքը` անձամբ տնօրենը, ես դա հստակ եմ ասում»,– ասաց նա` միաժամանակ չհերքելով ծնողների հայտնած մեկ այլ տեղեկություն. Այն, որ դպրոցը սանհանգույց չունի։
Գայանե Սայադյանի խոսքով` խնդիրն այն է, որ Ջրարբիի դպրոցի շենքն ընդհանրապես դպրոց չէ։ Այն ժամանակին պատկանել է թռչնաբուծարանին, իսկ երբ գյուղին դպրոց է հարկավոր եղել, հարմարեցվել է որպես այդպիսին։
«Դա եղել է թռչնաֆաբրիկայի կից կառույցներից մեկը, որը երկու տարի է, ինչ նվիրվել է համայնքին։ Այդ շենքը որպես դպրոց գործելու լիցենզավորում էլ չունի։ Ուղղակի համայնքը մեծ է, աշակերտների թիվը շատ է, մի կերպ պահում էինք, մինչև այդ շենքը նվիրեին»,– ասաց Սայադյանը` հավելելով, որ մինչև գարուն դպրոցն արդեն պետական գրանցում կստանա։
Նշենք, որ նախկին թռչնաբուծարանի շենքն այսօր Ջրարբի համայնքի միակ դպրոցն է։
Հիշեցնենք` այսօր առավոտից Ջրարբիի դպրոցում դասադուլ էր հայտարարված։ Գյուղի բնակիչները սպառնում էին փակել գյուղով անցնող հանրապետական նշանակության ավտոմայրուղին` մարզպետից պահանջելով լուծել գյուղի դպրոցի շենքային պայմանները։
