ԵՐԵՎԱՆ, 21 նոյեմբերի — Sputnik. Երևանը մտադիր է ընդլայնել համագործակցությունը Մոսկվայի հետ բոլոր ոլորտներում, այսօր ռուսաստանցի գործընկերոջ` Սերգեյ Լավրովի հետ հանդիպման ժամանակ հայտնեց ՀՀ արտգործնախարար Էդվարդ Նալբանդյանը։
«Մենք մեծ ծրագրեր ունենք` տնտեսական, առևտրային, միջտարածաշրջանային, մարդասիրական, մշակութային ոլորտներում համագործակցության ընդլայնման վերաբերյալ», — ասաց նա ընդլայնված կազմով հանդիպման ընթացքում։
Նալբանդյանը նշեց, որ Մոսկվայի և Երևանի միջև իսկապես բազմակողմանի համագործակցություն և դաշնակցային հարաբերություններ կան բառի բուն իմաստով։
Լավրովն իր հերթին նշեց երկու երկրների միջև առկա փոխգործակցության ռազմավարական, գործընկերային բնույթը։ Ռուսաստանի արտգործնախարարը հայ գործընկերոջը փոխանցեց Ռուսաստանի կայսրության արտաքին քաղաքականության արխիվային փաստաթղթերը, մասնավորապես Կաթողիկոսի` Պետրոս I-ին գրած նամակը, Կաթողիկոսի` արտաքին գործերի կոլեգիայի ասիական դեպարտամենտի ղեկավարին ուղղված գրությունը։
Ակնկալվում է, որ ավելի ուշ դիվանագետները կմասնակցեն Ազգային պատկերասրահում կազմակերպված ցուցահանդեսի բացմանը։ Ավելի վաղ նրանք ստորագրել էին ՌԴ արտաքին գործերի նախարարության և Հայաստանի արտաքին գործերի նախարարության միջև 2018-2019 թթ-ի խորհրդատվությունների ծրագիրը:
