ԵՐԵՎԱՆ, 22 նոյեմբերի — Sputnik. 2018 թվականի հունվարի 1-ից Հայաստանում մեկ խորանարդ մետր ջրի սակագինը 180 դրամից կհասնի 191,414 դրամի։ Այս մասին որոշումն ընդունեց ՀՀ Հանրային ծառայությունները կարգավորող հանձնաժողովը։
Բազային ժամանակացույցով 2018 թվականին սակագինը պետք էր բարձրանար 6 դրամով։ Սակայն կբարձրանա 11-ով, քանի որ հանրապետությունում ավելի քիչ ջուր էն օգտագործել, քան նախատեսել էին օպերատորն ու պետությունը։
«Վեոլիա ջուր» օպերատորի ժամանակացույցը հաստատվել էր դեռ 2016 թվականին, երբ Երևանի ջրմուղը ղեկավարող ընկերությունն ընդլայնել էր կոնցեսիան նաև մարզերի վրա։ Ամենաբարձրը սակագինը պետք է լինի 2022-23 թվականներին (212,4 դրամ)։ Բայց դա բազային սցենարով։ Իսկ գնաճի, էլեկտրականության սակագների բարձրացման կամ ջրի վաճառքի իջեցման պատճառով սակագինը կարող է ավելի աճել։
Մնում է սփոփվել այն մտքից, որ 2024 թվականից սակագինը կսկսի իջնել ու 2031 թվականին կկազմի 129,6 դրամ (եթե նշված երեք գործոնները չխանգարեն)։
«Վեոլիա Ջուր» ընկերությունը ֆրանսիական Veolia Eau — Compagnie Generale des Eaux կոնցեռնի մասնաճյուղերից է։
