ԵՐԵՎԱՆ, 22 նոյեմբերի — Sputnik. ՀՀ արտգործնախարար Էդվարդ Նալբանդյանը հայտարարել է, որ «Իսլամական պետություն» ահաբեկչական կազմակերպության (արգելված է Հայաստանում) շարքում զինյալներ կան Հայաստանի հարևան պետություններից։
Հայ ժողովուրդը դարերով ապրել է այլ պետություններում և սովորել է բարիդրացիական հարաբերություններ կառուցել տարբեր միջավայրերում, այդ թվում` մուսուլմանական։
«Մեզ համար մտահոգիչ է անհանդուրժողականության հողի վրա հանցագործությունները, հատկապես` Մերձավոր Արևելքում»,- ասել է Նալբանդյանը ԵԱՀԿ Ժողովրդավարական հաստատությունների և մարդու իրավունքների գրասենյակի և ԵԱՀԿ ավստրիական նախագահության «Քրիստոնյաների և կրոնական այլ խմբերի անդամների հանդեպ ատելության շարժառիթով հանցագործությունների կանխարգելումը և դրանց հակազդումը. հեռանկարներ ԵԱՀԿ-ից և անդին» խորագրով համաժողովի ժամանակ։
Նա հիշեցրել է` Հայաստանն առաջիններից մեկն է ՄԱԿ-ում բարձրացրել ազգային և էթնիկ խմբերի պաշտպանության հարցը` կապված Սիրիայում և Իրաքում «Իսլամական պետության» գործողությունների հետ։
Սիրիայում վերջին տարիներին քրիստոնյա համայնքը 1 միլիոն 250 հազարից հասել է 500 հազարի, իսկ Իրաքում նվազել է մոտ 80%-ով։
Հայաստանի իշխանությունը հետևողականորեն բարձրացրել է ոչ միայն քրիստոնյաների, այլև եզդիների հարցը, որոնք նույնպես տուժել են ծայրահեղականների պատճառով։
«Պետք է նկատել, որ ԻՊ-ի զինյալների շարքում եղել են նաև Հայաստանի հարևան երկրների ներկայացուցիչներ»,- ասել է Նալբանդյանը։
Նա ևս մեկ անգամ ընդգծել է, որ ահաբեկչությունը չպետք է քողարկվի կրոնով, իսկ դրա դեմ պայքարն ընդհանուր գործ է բոլոր երկրների համար։
