ԵՐԵՎԱՆ, 23 նոյեմբերի — Sputnik. Հայաստանն էլ է պատրաստ ողջունել Ադրբեջանի մուտքը ԵԱՏՄ։ Այսօր լրագրողների հետ զրույցում նման արտահայտություն արեց ՀՀ ԱԳ փոխնախարար Շավարշ Քոչարյանը` անդրադառնալով ՌԴ ԱԳ նախարար Սերգեյ Լավրովի Բաքու այցելության ժամանակ արված հայտարարությանը, թե Ռուսաստանը ուրախ կլինի, եթե Ադրբեջանն անդամակցի ԵԱՏՄ-ին։
«Ադրբեջանի ԵԱՏՄ–ին միանալը կամ դիտորդ դառնալը մեր կողմից էլ կողջունվի, եթե Ադրբեջանը կատարի ԵԱՏՄ թե՛ դիտորդ և թե՛ անդամ պետությունների համար սահմանված պարտավորությունները»,– ասաց Քոչարյանը` մեկնաբանելով, որ դա նշանակում է վերացնել Հայաստանի նկատմամբ տնտեսական շրջափակումը, դադարեցնել թշնամական գործողությունները, վերջ տա հայատյացությանը։
«ԵԱՏՄ մասին պայմանագրով անդամ կամ դիտորդ որևէ պետություն չպետք է որևէ քայլ ձեռնարկի ի վնաս այլ անդամ պետությունների կամ Եվրասիական տնտեսական միության։ Դա ենթադրում է, որ, եթե Ադրբեջանը ցանկանում է այս կամ այն կերպ մոտենալ ԵԱՏՄ–ին, նա պետք է այդպիսի քայլեր չձեռնարկի»,– ասաց Քոչարյանը։
Անդրադառնալով ԼՂ խնդրի կարգավորման շուրջ բանակցություններին` Շավարշ Քոչարյանն ընդգծեց, որ առաջընթացի հասնելու համար կողմերի միջև պետք է լինի վստահություն։
Տվյալ պարագայում, երբ կողմերից մեկն ունի կա՛մ ամեն ինչ, կա՛մ ոչինչ դիրքորոշումը, ԱԳ փոխնախարարը հարցի արագ կարգավորում չի ակնկալում։ Նրա խոսքով` առաջընթաց չի լինի այնքան ժամանակ, քանի դեռ Բաքվի դիրքորոշումը չի փոխվել։
