ԵՐԵՎԱՆ, 8 դեկտեմբերի — Sputnik. ՀՀ ԱԺ-ն առաջին ընթերցմամբ (ոչ վերջին) ընդունեց «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրինագիծը։
Կողմ քվեարկեցին պատգամավորներից 73-ը, դեմ` 12-ը, ձեռնպահ` 6-ը։
Օրինագիծն իրավական և հոգեբանական աջակցություն է առաջարկում (իսկ անհրաժեշտության դեպքում նաև կացարան) ծեծի կամ ծաղրանքի ենթարկված ընտանիքի անդամներին։ Առաջարկվում են նաև հաշտեցման միջոցներ զոհի և նրան բռնության ենթարկած անձի միջև (ամուսնու և կնոջ, ծնողների և երեխաների)։
Այնուամենայնիվ, ո՛չ ոստիկաններին, ո՛չ էլ քննիչներին թույլ չեն տա իրենց հայեցողությամբ ստուգումներ անցկացնել ընտանիքներում։
Ավելի վաղ օրինագծին դեմ էին հանդես եկել «Ծառուկյան» դաշինքի մի շարք պատգամավորներ, այդ թվում` իրավաբան Գևորգ Պետրոսյանը։
«Ոստիկանությունն ինքնագլուխ մեր տները չի գալու։ Միայն կնոջ կամ երեխայի բողոքի դեպքում։ Սակայն սա էլ լավ չէ։ Այսպես մենք խորհրդային ժամանակներ ենք վերադառնում։ Լինում էր այնպես, երբ կինը պայմանավորվում էր ոստիկան-սիրեկանի հետ, բողոքում ամուսնուց, և ամուսնու դեմ գործ էին հարուցում։ Չէ՞ որ նման բաներ եղել են։ Հիմա մենք դրա՞ն ենք վերադառնում», — այն ժամանակ ասել էր Պետրոսյանը։
Իր մտավախությունները նա հնչեցրեց նաև այսօր քվեարկությունից առաջ. «Այս օրինագիծը քանդում է մեր տներն ու ընտանիքները», — հայտնեց նա։
Այնուամենայնիվ պատգամավորների մեծամասնությունը «կողմ» քվեարկեց։
