ԵՐԵՎԱՆ, 11 դեկտեմբերի — Sputnik. Մարդու պապիլոմավիրուսային վարակի դեմ «Գարդասիլ» պատվաստանյութով պատվաստումներն այսօր Հայաստանում պաշտոնապես մեկնարկեցին։ Թե քանի մարդ է առաջին օրն այցելել պոլիկլինիկա` պատվաստվելու, առողջապահության նախարարությունում հստակ տեղեկատվություն առայժմ չունեն։ ՀՀ ԱՆ Իմունականխարգելման ազգային ծրագրի ղեկավար Գայանե Սահակյանը Sputnik Արմենիային հայտնեց, որ համայնքային պոլիկլինիկաների տվյալները նոր է ստացվում։
Բայց առկա տվյալներն էլ բավական են պնդելու, որ պատվաստվողներ եղել են։ «Արմավիրում 4 մարդ, Գյումրիում` 1, Երևանի թիվ 12 պոլիկլինիկայում` 1 մարդ,– հայտնեց Գայանե Սահակյանը,– առաջին օրն է։ Մարդկանց մոտ մտավախություն կա, վախեցած են, դրա համար մեկ-երկու օր կսպասեն, մի քանի հոգի պատվաստվեն, կհամոզվեն, որ ոչ մի վտանգավոր բան չկա, նոր իրենք էլ կգնան»,– ասաց նա։
Առողջապահության նախարարության ներկայացուցիչը վստահեցնում է` պատվաստումները կատարվելու են բացառապես պոլիկլինիկաներում։ Դպրոցներում աղջիկներին համատարած պատվաստելու մասին խոսակցություններն անհիմն են։ «Մանկաբույժն ու ընտանեկան բժիշկը կազմելու են շահառուների ցանկը և հերթականությամբ զանգահարելու են տուն` կանչեն»,– ասաց Սահակյանը։
Պատվաստումից հրաժարվելու դեպքում, նրա խոսքով, ևս պետք է ներկայանալ պոլիկլինիկա, որտեղ ծնողը պետք է ձեռագիր հրաժարական գրի` հավաստելով, որ իրազեկված է հնարավոր հետևանքների մասին։
Գայանե Սահակյանից հետաքրքրվեցինք` արդյոք Առողջապահության նախարարության աշխատակիցների երեխաներն ու թոռներն այցելել են պատվաստման, ինչպես հայտարարվել էր։ Պարզվեց` ոչ։ Մեր զրուցակցի խոսքով` աշխատակիցների երեխաներն ու թոռները հրապարակավ պատվաստվել են օրեր առաջ Ծաղկաձորում այդ թեմայով կայացած սեմինար–քննարկման ընթացքում։
«13 տարեկաններն այդքանն էին։ Ով կար, այնտեղ պատվաստվել է»,– ասաց մեր զրուցակիցը։
Ս.թ. դեկտեմբերի 11-ից սկսած ՀՀ առողջապահության նախարարությունը «Գարդասիլ» պատվաստանյութով պատվաստելու է 13 տարեկան աղջիկներին` արգանդի վզիկի քաղցկեղը կանխարգելելու համար։ Տարիքային այդ խումբն է համարվել առավել նպատակահարմար, քանի որ պատվաստումը պետք է կատարվի մինչև առաջին սեռական հարաբերությունը։
Մարդու պապիլոմավիրուսային վարակի դեմ Հայաստան ներկրված «Գարդասիլ» պատվաստանյութն ամերիկյան արտադրության է, արտադրվել է 2016 թ–ին` երեք տարի պիտանիության ժամկետով։ Նախարարության հավաստմամբ` պատվաստանյութի ամբողջ խմբաքանակը մինչ Հայաստան ներկրվելը լաբորատոր փորձաքննություն է անցել Նիդեռլանդներում։
