ԵՐԵՎԱՆ, 25 դեկտեմբեր — Sputnik. Չնայած խիստ արգելքին` երևանյան փողոցներում հանդիպում են սիգ վաճառողներ։ Նրանցից ոմանց նախօրեին հայտնաբերել են բնապահպանական տեսչության աշխատակիցները։ Սիգի ապօրինի որսն ու վաճառքը չխթանելու համար ՀՀ բնապահպանության նախարարն Արծվիկ Մինասյանն այսօր լրագրողների հետ հանդիպման ժամանակ քաղաքացիներին կոչ արեց չգնել անօրինական վաճառվող ձուկը։
«Կոչ եմ անում ազգաբնակչությանը զսպել սիգ ուտելու ախորժակը։ Այս զսպումը հետագայում բերելու է ձկնապաշարների ավելացման, որը կբավարարի բոլորի ախորժակը»,- ասաց նա:
Եթե նույնիսկ սիգը չի վաճառվում, միևնույն է` նախարարության մասնագետները գիտեն, թե որտեղ է այն պահվում։ Դրանք, ըստ Մինասյանի, պահվել են սառնարաններում և հարմար պահի հանվում են վաճառքի։
Նախարարը շեշտեց, որ սիգի վաճառքն արգելված է ամբողջ տարվա ընթացքում։
«Բանն այն է, որ սիգի որսի ժամանակ որսվում է մոտ 12 տոկոսի այլ ձկնատեսակ, որը թույլատրելի չէ։ Անցած տարվա փորձը ցույց տվեց, որ դրական զարգացում ունեցանք, երբ արգելեցինք ձվադրման այս շրջանում սիգի որսը։ Արդյունքում ունեցանք սիգի 13-14 տոկոսի աճ»,- ասաց նա։
Այսօր ծայրահեղ վատ վիճակում են Սևանի էնդեմիկ ձկնատեսակները` կողակն ու բեղլուն, որոնց որսը Սևանում ընդհանրապես արգելված է, թեև մասնագետների կարծիքով, այս ձկնատեսակները նույնիսկ պատահաբար չեն կարող հայտնվել ձկնորսական ցանցում։
Սևանի մնացած ձկնատեսակների պաշարների որոշակի հաշվարկ ՀՀ ԳԱԱ Հիդրոէկոլոգիայի և ձկնաբանության ինստիտուտը վարում է։ Դրանց համաձայն` 2016թ-ի համեմատ այս տարի Սևանա լճում սիգի պաշարներն ավելացել են 14 տոննայով` 450-ից հասնելով 554-ի, իշխանինը` շուրջ 16 տոննայով` 1-1.5-ից հասնելով 17-ի, իսկ խեցգետնի պաշարները Սևանում շուրջ 2000 տոննայով նվազել են` 4582 տոննայից հասնելով 2600-ի։
Լճում արժեքավոր տեսակների պահպանման ու ծավալների ավելացման համար բնապահպանության նախարարի հրամանով ձվադրման սեզոնին ընդառաջ` 2017թ. դեկտեմբերի 20-ից 2018թ. հունվարի 15-ը Սևանա լճում արգելվել է ձկան և խեցգետնի որսը։
