ԵՐԵՎԱՆ, 26 դեկտեմբերի — Sputnik. Հայ-ռուսական փոխադրողի ստեղծման հարցը մնաց առաջարկության մակարդակում, այսօր լրագրողներին ասաց ՀՀ կառավարությանն առընթեր քաղաքացիական ավիացիայի գլխավոր վարչության պետ Սերգեյ Ավետիսյանը։
«Դա գործընկեր երկրի առաջարկ էր, որ կարող էր հնչեցվել ցանկացած այլ երկրի կամ ներդրողի կողմից։ Մեզ համար ներդրումներ անելու առաջարկություն էր, մասնավորապես` ավիացիոն ոլորտում։ Բնականաբար, մենք դրական արձագանքեցինք` պատրաստականություն հայտնելով քննարկել այն ծրագիրը, որը կարող է օգնել ոլորտի զարգացմանը», — ասաց Ավետիսյանը։
Տվյալ պահին, նրա խոսքով, այլ քայլեր դեռ չեն ձեռնարկվել տարբեր պատճառներով։
«Նման մեծ քայլերը մեկ կամ տասը օրում չեն իրականացվում։ Բայց մենք միշտ պատրաստ էինք, պատրաստ ենք ու պատրաստ կլինենք նման հարցեր քննարկելու համար», — ասաց Ավետիսյանը։
Մոտ մեկ տարի է` Հայաստանն ու Ռուսաստանը քննարկում են ազգային նոր ավիափոխադրողի ստեղծման հարցը։ 2017 թվականի հոկտեմբերին ՌԴ արդյունաբերության և առևտրի նախարար Դենիս Մանտուրովը հայտնել էր, որ կողմերը քննարկման վերջին փուլում են։ Ենթադրյալ ավիաընկերության համար որպես հեռանկարային ուղղություններ էին նշվել Սոչին, Ստավրոպոլն ու մի շարք այլ քաղաքներ, որտեղ հայկական սփյուռք կա։
Մանտուրովը նշել էր, որ ռուսական կողմը կարող է Հայաստանին տրամադրել տասը Sukhoi SuperJet 100։ Ռուսական կողմի խոսքով, առաջին ինքնաթիռները պետք է մատակարարվեին 2019 թվականին։