ԵՐԵՎԱՆ, 21 հունվարի — Sputnik, Արամ Գարեգինյան. Որքա՞ն արճիճ կամ ԳՁՕ է մնում մեր ատամների վրա և ստամոքսում բանջարեղանային աղցան ուտելուց հետո: Կամ ճաշից հետո կերած մրգերից: Մի վախեցեք, հայկական դեղձերը կամ սմբուկը ոչ մեկ «բացահայտել» չի պատրաստվում: Պարզապես ապագայի համար ուզում ենք իմանալ, թե ո՞ր շրջաններում աղտոտիչներ կան և որքան են դրանք: Այնուհետև պարզ կդառնա, թե որտեղ և ինչպես պայքարել թունաքիմիկատների կամ նիտրատների դեմ:
Այս բոլոր հարցերի պատասխանը պետք է տա բուսական արտադրանքում թունաքիմիկատների մնացորդների հանրապետական առաջին մոնիտորինգը: Այն անցկացնելու է ՀՀ գյուղատնտեսության նախարարության սննդամթերքի անվտանգության պետական ծառայությունը:
Իմանալով, թե որտեղ և ինչով են սրսկում բույսերը, հնարավոր կլինի հետևել, թե արդյոք չեն գերազանցում սահմանային թույլատրելի կոնցենտրացիան և արդյոք ժամանակից շուտ չեն հավաքում բերքը: Քանի որ եթե սրսկեն, ու հետո ժամանակից շուտ հավաքեն բերքը, ապա պտուղներում այդ նյութերը չեն մարսվի: Եվ այդ դեպքում դրանք կմարսենք ենք մենք:
Ծանր մետաղների առկայությունը հիմնականում ստուգելու են Սյունիքի և Լոռու մարզերում (որոնք մոտ են գտնվում խոշոր հանքավայրերին), իսկ պեստիցիդների և նիտրատինը` ողջ հանրապետությունում:
Իսկ ԳՁՕ-ի առկայությունը կստուգեն ինչպես պատրաստի պտուղներում, այնպես էլ սերմերում:
Այս բոլոր չորս պարամետրերի համար` ԳՁՕ, պեստիցիդներ, նիտրատներ և ծանր մետաղներ, կստուգեն մոտ 3 400 նմուշ: Դրանցով կկազմեն Հայաստանի «համեղ» քարտեզը: Իսկ հետո կմտածեն, թե ինչպես պայքարել այդ ամենի դեմ:
Գենետիկորեն ձևափոխված այդ բույսերն ու մթերքները արգելված չեն ոչ Հայաստանում, ոչ էլ Եվրասիական Միությունում: Սակայն Ռուսաստանից հետո ԵԱՏՄ երկրները մտադիր են ներմուծման համար թույլատրված ԳՁՕ-գենոմների ընդհանուր ռեգիստր կազմել:
«Սա ինչ վերաբերում է ներկրմանը: Սակայն կա նաև ներքին շրջանառության խնդիր: Այդ պատճառով մենք ուզում ենք տեսնել, թե որտեղ են հետո ցանում այդ սերմերը և ուր է գնում բերքը: Թույլատրելը թույլատրում ենք, բայց նաև պետք է հետևենք», — Sputnik Արմենիայի թղթակցի հետ զրույցում պարզաբանեց Պետական ծառայության ֆիտոսանիտարական տեսչության պետ Արթուր Նիկոյանը:
Մոնիտորինգը կսկսեն իրականացնել ապրիլին, իսկ հետագայում հույս ունեն այն ամենամյա դարձնել:
