ԵՐԵՎԱՆ, 22 հունվարի — Sputnik. Պետք չէ իշխանությանը մեղադրել հնարավոր բոլոր թանկացումների մեջ։ Այս մասին խորհրդարանում պատգամավորական ճեպազրույցների ժամանակ ասաց «Դաշնակցություն» խմբակցության քարտուղար Աղվան Վարդանյանը։
Նրա խոսքով` սեղմված գազի ակցիզային հարկն ավելացել է, բայց գինը վերադարձել է երկու տարի առաջվա մակարդակին, ոչ ավելին։
«Բայց նույնիսկ այդ դեպքում սեղմված գազը բենզինից էժան է։ Ես իմ սեփական մեքենայի օրինակով եմ տեսնում։ Երբ բենզինից գազի անցա, սկսեցի երեք անգամ քիչ վճարել։ Նշանակում է` մեր վարորդները կարող են բենզինը գազով փոխարինել։ Ու այստեղ վարչապետը իրավացի էր», — ասել է Վարդանյանը։
ՀՀԿ խմբակցության ղեկավար Վահրամ Բաղդասարյանը նույնպես հորդորեց ամեն ինչում իշխանությանը չմեղադրել։ Հեշտ է առաջարկել հարկերն իջեցնել, իսկ բյուջեի համար նոր եկամտի աղբյուրներ գտնելը շատ ավելի դժվար է։
«Նոր կառավարության քաղաքականությունն է ստեղծել տնտեսական աճի պայմաններ (այդ թվում` հարկերի միջոցով), որի շնորհիվ քաղաքացիների եկամուտը կաճի», — նշեց Բաղդասարյանը։
Նշենք, որ օրերս ՀՀ վարչապետ Կարեն Կարապետյանը հարկերի դրույքաչափերի բարձրացումը ինքնանպատակ չէ. ունենք տնտեսությունը զարգացնելու խնդիր։ Իսկ մթերքները թանկացել են համաշխարհային շուկայում գնային տատանումների պատճառով, հարկերն այստեղ կապ չունեն։
Գնաճը Հայաստանում 12 ամսվա ընթացքում 2,6% է կազմել։ Հատկապես թանկացել են կարագը, միսն ու կարտոֆիլը, բայց մի շարք այլ ապրանքներ (մասնավորապես հնդկաձավարն ու շաքարավազը) էժանացել են։
