ԵՐԵՎԱՆ, 13 փետրվարի — Sputnik. «Քրեական հեղինակություն համարվող Ալավերդցի Վահագնը, որն իր պաշտպանի բնորոշմամբ՝ բարեգործ է և բարերար, տարիներ առաջ «թալանել» է իր բարեկամին: «Հայկական ժամանակ» օրաթերթը գրում է, որ այս մասին բարձրաձայնվում է այսօր միայն, այն բանից հետո, երբ Աբգարյանը մեղադրյալի կարգավիճակով հայտնվել է ՔԿՀ-ում:
«Չնայած նրա անազատության մեջ գտնվելու հանգամանքին, Ալավերդիում այնուամենայնիվ վախի մթնոլորտը դեռ շարունակվում է: Նրանից տուժած բարեկամը վախենում է իր անվտանգության համար, իսկ մեզ ներկայացվող դեպքի մասին պատմած նրա ընկերուհին հասկանալի պատճառներով նույնիսկ չցանկացավ ներկայանալ»,- նշված է հոդվածում:
Նա թերթի թղթակցի հետ զրույցում պատմել է, որ տուժած բարեկամը խանութ է աշխատեցնում, և 2014 թվականին Վահագն Աբգարյանը վարկ մուծելու պատրվակով բարեկամից 3800 դոլար է խնդրել՝ կես ժամից վերադարձնելու պայմանով: Կես ժամը դարձել է 4 տարի:
«Ալավերդից Վահագը ոչ թե բարերար է, այլ թալանչի ու բարեպիղծ: Նա իր հարազատ բարեկամին է թալանել մի քանի հազար դոլար և այդ թալանած գումարով բարերարություն արել»,- ասել է բարեկամի ընկերուհին:
Նա պատմել է նաև, որ երբ թալանի ենթարկված անձը դիմել է Ալավերդցի Վահագնի մորը՝ խնդրելով վերադարձնել իր մի քանի հազար դոլարը, քրեական հեղինակության մայրը սպառնացել է ոչնչացնել որդու զոհին, եթե նա բողոք ներկայացնի ոստիկանություն: Ընդ որում, սպառնացել է ազդեցիկ ու հզոր անձանցով:
Ընկերուհու պնդմամբ՝ կնոջը պարբերաբար վախեցրել են Վահագն Աբգարյանի «աջ ձեռքը» համարվող Արկո մականունով Արթուր Մնացականյանի միջոցով:
