ԵՐԵՎԱՆ, 13 փետրվարի — Sputnik. Մեծամորի ԱԷԿ-ի անվտանգության վերաբերյալ Հայաստանն ու ԵՄ-ն տարբեր տեսակետներ ունեն, սակայն ամեն ինչ ՄԱԳԱՏԷ-ն է որոշում։ Այս մասին լրագրողներին ասաց ՀՀ էներգետիկ ենթակառուցվածքների և բնական պաշարների փոխնախարար Հայկ Հարությունյանը։
ՄԱԳԱՏԷ-ի մոնիտորինգային առաքելություններն ամեն անգամ հաստատում են` կայանում ամեն ինչ հանգիստ է։
«Իսկ բուն ԵՄ-ում նման կայանների կյանքը և՛ 20, և՛ 30 տարով են երկարաձգել»,- նշեց նա։
Այնուամենայնիվ, պետք չէ կարծել, թե ԵՄ-ի հետ համաձայնագիրը սպառնում է հայկական ԱԷԿ-ին։
«Ո՛չ մենք, ո՛չ էլ որևէ մեկը երբեք պատրանքներ չի ունեցել, որ կայանը կարող է հավերժ ծառայել։ Վաղ թե ուշ պետք է հասկանալ, թե երբ ու ինչպես է այն ավարտելու իր աշխատանքը։ Դա ակնհայտ է բոլորի համար։ Սակայն ակնհայտ է նաև այն, որ մոտ ապագայում նման բան չի լինի», — ասաց փոխնախարարը։
Կայանի անվտանգ աշխատանքի համար Հայաստանի իշխանությունն անդադար ներդրումներ է անում։ 1995 թվականին (ԱԷԿ-ի վերագործարկումից հետո) և մինչև 2015 թվականը այդ նպատակով շուրջ 150 մլն դոլար է հատկացվել, իսկ 2015 թվականին Ռուսաստանի հատկացրած 300 մլն դոլարի մեծ մասը (170 մլն) կուղղվի հենց անվտանգությանը։
Հայաստանի ատոմակայանն է անվտա՞նգ, թե՞ Թուրքիայի «Ակույուն»
Սակայն երբ կայանում փոխեն երկու տուրբոգեներատորները, այն կկարողանա անվտանգ ծառայել մինչև 2026 թվականի վերջը։ Իսկ վերանորոգումից հետո հզորությունը նույնիսկ կաճի` 390-ից մինչև 430 ՄՎտ, ընդգծեց փոխնախարարը։
Այսօր հայկական ԱԷԿ-ը Հայաստանում բոլորից շատ (33-35%) և բոլորից մատչելի էլեկտրաէներգիա է արտադրում։
