ԵՐԵՎԱՆ, 15 փետրվարի — Sputnik. ԱՄՆ-ին չի մտահոգում մյուս երկրների շահերը և անհրաժեշտության դեպքում կարող է պատժամիջոցներ կիրառել և՛ Հայաստանի, և՛ Ադրբեջանի նկատմամբ, Sputnik Արմենիային ասաց քաղաքական և ռազմական վերլուծության ինստիտուտի փոխտնօրեն Ալեքսանդր Խրամչիխինը։
ԱՄՆ-ն հունվարի 29-ից կարող է սկսել պատժամիջոցներ կիրառել ցանկացած երկրի այն ընկերությունների նկատմամբ, որոնք զգալի/էական գործարքներ կկնքեն ռուսական պաշտպանական կամ հետախուզական հատվածի կազմակերպությունների հետ «Ամերիկայի հակառակորդներին հակազդելու մասին» (CAATSA) օրենքի շրջանակում։
«Մի փոքր դժվար է պատկերացնել, բայց պատժամիջոցների կիրառումը տեսականորեն հնարավոր է» — ասաց Խրամչիխինը։
Նրա խոսքով` ամերիկյան պատժամիջոցների կիրառումը հարաբերական է։
«Ամերիկացիներին Հայաստանի շահերը հաստատ չեն հուզում։ Նրանք գործում են սեփական շահերից ելնելով, երբեմն էլ ղեկավարվում են բացարձակ անտրամաբանական հասկացություններով», — ասաց Խրամչիխինը։
Ամերիկացիների համար, իրենցից բացի, որևէ մեկը գոյություն չունի։ Փորձագետի խոսքով` նրանք հիմա ընդհանրապես «ինչ-որ» հոգեբանական խնդիրներ ունեն։
«Նրանցից ամեն ինչ սպասելի է։ Եվ հասկանալի է, որ ոչ մեկի շահերը նրանք հաշվի չեն առնելու», — ասաց Խրամչիխինը։
«Ռազմինֆո» ռազմատեղեկատվական կայքի համակարգող, ռազմական փորձագետ Կարեն Վրթանեսյանն իր հերթին կարծում է, որ հաշվի առնելով Ռուսաստանի և ԱՄՆ-ի լարված հարաբերությունները` Հայաստանը պետք է ցանկացած պահի պատրաստ լինի, որ կարող են պատժամիջոցներ ու որոշակի հետևանքներ լինել Ռուսաստանի և Հայաստանի համագործակցությունից։
«Նման վտանգ միշտ կար ու շարունակում է լինել», — ասաց Վրթանեսյանը։
Մյուս կողմից, նրա խոսքով, Հայաստանի և Իրանի համագործակցության օրինակը կա։ Վաշինգտոնում լավ են հասկանում, որ Ռուսաստանի մի շարք գործընկերներ այլ տարբերակներ չունեն ռազմական գնումներ իրականացնելու համար։
Նրա խոսքով հասկանալի է, որ ռուս-ամերիկյան հարաբերություններն ազդում են նաև հայ-ամերիկյան հարաբերությունների վրա, բայց այդ հարցում Հայաստանը փորձում է առավելագույնս չեզոք լինել։
«Դա հասկանում են և՛ ԱՄՆ-ում, և՛ Ռուսաստանում», — ասաց Վրթանեսյանը։
Ինչ վերաբերում է Ադրբեջանին, ապա Վաշինգտոնի և Բաքվի միջև լարվածություն կա մարդու իրավունքների, Ազատություն ռադիոկայանի մասնաճյուղի փակման, ամերիկամետ անձանց վրա պարբերական ճնշումներ գործադրելու պատճառով։
Սակայն բիզնեսի մակարդակում, նրա խոսքով, բավական նորմալ են հարաբերությունները, և ԱՄՆ-ն հազիվ թե լուրջ պատժամիջոցներ կիրառի Ալիևի նկատմամբ։
Միևնույն ժամանակ Վրթանեսյանը չի կարծում, որ Ադրբեջանն ի տարբերություն Հայաստանի հնարավորություն ունի դիվերսիֆիկացնելու իր ռազմական գնումները, հատկապես ծանր զրահատեխնիկայի և հրետանու առումով։ Բանն այն է, որ սպառազինության սպասարկման ամբողջ ենթակառուցվածքը հարմարեցված է ռուսական զենքին։
Նա նշեց, որ Ֆինլանդիայում զենքի զգալի մասը նույնպես խորհրդային և ռուսական արտադրության է։
«Կասկածում եմ, որ ԱՄՆ-ն պատժամիջոցներ կկիրառի Ֆինլանդիայի նկատմամբ», — ասաց Վրթանեսյանը։
ԱՄՆ Պետդեպարտամենտը հայտարարել է, որ ավելի վաղ հակառուսական պատժամիջոցները որոշ արտասահմանյան պետությունների ստիպել են հրաժարվել «մի քանի մլրդ դոլարի զենք» գնել Մոսկվայից։
