ԵՐԵՎԱՆ, 1 մարտի — Sputnik. ՀՀ վարչապետ Կարեն Կարապետյանն այսօր կառավարության հերթական նիստը սկսեց արդեն ավանդական դարձած հանձնարարականներով։ Նա հայտարարեց, որ Տարածքային կառավարման նախարարությունն ու ջրային պետական կոմիտեն այս օրերին, ոռոգման սեզոնին ընդառաջ, համատեղ մաքրում են ոռոգման ջրանցքների հուները։ Վարչապետը հանձնարարեց նաև հետագայում տուգանք սահմանել ջրանցքներն աղտոտողների, դրանցում աղբ թափողների համար։
«Բերում, աղբը թափում ենք, հետո բողոքում ենք,- ասաց Կարապետյանը,- մենք լրացուցիչ փող ենք ծախսում այնտեղ, որտեղ պրոբլեմը մենք ենք ստեղծում»։
Վարչապետի հանձնարարությամբ` կառավարությունը կմշակի վարչական իրավախախտումների օրենքում համապատասխան փոփոխություն, որի ընդունումից հետո ոռոգման ջրանցքներում աղբ թափողները կտուգանվեն։
Մեկ այլ հանձնարարությամբ վարչապետը հորդորեց ուշադրություն դարձնել ՀՀ խոշոր քաղաքների, մասնավորապես Երևանի և Գյումրու մուտքի-ելքի ճանապարհների, հատկապես օդանավակայանների հետ կապող ավտոճանապարհների բարեկարգմանը։
Երրորդ հանձնարարականը վերաբերում էր մարտի 9-12-ը ոչ աշխատանքային հայտարարված օրերին տնտեսվարողների անխափան աշխատանքի ապահովմանը։ Կարապետյանն այդ նպատակով հանձնարարեց Մաքսային կոմիտեի, ՍԱՊԾ և ԿԲ ղեկավարներին՝ նշված օրերին ապահովել մաքսակետերի, սննդի անվտանգության կառույցների և բանկերի անընդհատ աշխատանքը, որպեսզի տնտեսվարողները կարողանան կատարել փաստաթղթային ձևակերպումներն ու վճարումները։
