ԵՐԵՎԱՆ, 7 մարտի — Sputnik, Արմենուհի Մխոյան. Մարտի 7-ին Գյումրու «Ռուսաստանի գիտության և մշակույթի կենտրոնում» բացվեց Հայաստանի Հանրապետության և Ռուսաստանի Դաշնության միջև դիվանագիտական հարաբերությունների հաստատման 25-ամյակին նվիրված ցուցահանդեսը: Մոտ մեկ ամիս շարունակ կենտրոն այցելած հյուրերը կարող են ծանոթանալ երկու երկրների դիվանագիտական հարաբերությունների հաստատման ֆոտոնյութերին ու փաստաթղթերին:
«Երկու երկրների դարավոր պատմությանն առնչվող արխիվային նյութերից ընտրվել են վերջին շրջանի հայ-ռուսական դիվանագիտական հարաբերությունների ամրությունն ու փոխադարձ բարեկամությունն արտացոլող վավերագրերը: Ցուցահանդեսը նախաձեռնել են երկու երկրների պետական արխիվները»,- Sputnik Արմենիային ասաց Հայաստանում «Ռուսաստանի գիտության և մշակույթի կենտրոնի» ներկայացուցիչ Իրինա Կասացկայան։
Հարաբերությունների 25-ամյակը նշվել է 2017-ին, և ցուցահանդեսը մեկ տարի առաջ է բացվել Երևանում՝ Հայաստանի պետական պատկերասրահում, բայց Կասացկայայի խոսքով, այդ ցուցահանդեսը չէր կարող չներկայացվել նաև Գյումրիում:
«Գյումրին միշտ էլ կարևոր դեր է ունեցել և ունի երկու երկրների հարաբերությունների մեջ, և անչափ կարևոր էր այդ ցուցահանդեսը ներկայացնել նաև Հայաստանի երկրորդ քաղաքում»,- նշեց նա:
Գյումրիում անցկացվեց նաև «Հայաստան-Ռուսաստան բարեկամություն` կոփված դարերով» խորագիրը կրող կլոր-սեղան քննարկում: Քննարկումը նվիրված էր Թուրքմենչայի պայմանագրի կնքման 190-ամյակին:
«Այս հողերը պաշտպանել են ինչպես հայերը, այնպես էլ ռուսները: Թուրքմենչայի պայմանագրի մասին խոսելիս մենք հենց այստեղ՝ Գյումրու տարածքում, այդ փաստի մասին վկայող պատմական շատ վայրեր ենք տեսնում»,- նշեց Կասացկայան:
Գյումրիում ՌԴ հյուպատոս Ալեքսանդր Կոպնինը նույնպես կարևորեց փաստաթուղթը՝ այն անվանելով ամենագլխավոր փաստաթղթերից մեկը:
«Այս տարի նշում ենք Թուրքմենչայի պայմանագրի 190-ամյակը։ Սա, կարծում եմ, ամենակարևոր փաստաթուղթն է: Այն հաղթանակները, որ գրանցվեցին այդ ժամանակ, ամենամեծ հաղթանակները կարելի էր համարել ռուս զինվորների և հայ ժողովրդի համար: Մեր պատմաբաներն այսօր ևս վկայում են՝ սա մեծ կարևորություն ներկայացնող փաստաթուղթ է երկու ազգերի համար»,- ասաց նա:
Հայ-ռուսական հարաբերություններին նվիրված երկօրյա միջոցառումների մեկնարկը տրվել էր մարտի 6-ին Երևանում, իսկ ավարտը՝ Գյումրիում: Այս երկու օրերի ընթացքում մասնակիցները նաև այցելել են պատմական երկու երկրների հարաբերությունների մասին վկայող հուշակոթողներ:
