ԵՐԵՎԱՆ, 15 մարտի — Sputnik. Բիզնես-դասեր անցկացնող Սամվել Լիմինդրովիչն իր Աստղիկ դստերը տրիկոտաժի ոլորտ գործուղելուց հետո հիմա էլ զբաղված է մյուս դստերը տեղավորելով՝ բժշկական համալսարանի երկրորդ կուրսի ուսանողուհի Լուսինե Սամվելովնան պատրաստվում է տնօրինելու լիմինդրովիչյան բժշկական ոլորտը և ղեկավարելու է «Աստղիկ» բժշկական կենտրոնը, ուր այս օրերին «ստաժորություն» է անցնում։ Այս մասին գրում է «Հրապարակ» թերթը։
«Բայց «ստաժորն» արդեն իսկ սկսել է որոշումներ կայացնել, և բուժանձնակազմը նրան է որպես տնօրեն «պրիզնատ» գալիս։ Նա փորձում է «ուրույն» բարեփոխումներ իրականացնել ոլորտում, մասնավորապես՝ կադրային հարցերում` փորձելով օպտիմալացնել բուժաշխատակազմը, խնայել հայրիկի գումարները, որոնք բիզնես-դասընթացի հաջորդ էտապին ավելի են պետք գալու»,- նշված է հոդվածում:
Ըստ թերթի` Ալեքսանյանը մտադիր է ստեղծել օնկո-կենտրոն, որը կունենա թե՛ «ՊԷՏ-սկան», թե՛ ճառագայթման համար անհրաժեշտ սարքավորումներ: Գաղտնիք չէ, որ այսօր Հայաստանի բոլոր հիվանդներն արտասահման՝ Գերմանիա, Իսրայել, վերջերս ավելի հաճախ Վրաստան են մեկնում այդ բուժծառայությունների համար: Դուստր Լուսինեն փորձում է առողջապահական բիզնեսն արտերկրից տեղափոխել «Աստղիկ»:
