ԵՐԵՎԱՆ, 20 մարտի — Sputnik. Պաշտպանական կողմը մտադիր է բողոքարկել «Հիմնադիր Խորհրդարան» նախաձեռնության ղեկավար Ժիրայր Սեֆիլյանի նկատմամբ կայացրած դատավճիռը։ Այս մասին Sputnik Արմենիային հայտնեց Սեֆիլյանի պաշտպաններից մեկը` Հարություն Բաղդասարյանը։
Նրա խոսքով` Սեֆիլյանի փաստաբաններն անում են հնարավոր ամեն բան, որպեսզի ապացուցեն մեղադրանքների անհիմն լինելը։
«Բոլորին պարզ է, որ դատավճիռը բացառապես քաղաքական ենթատեքստ ունի։ Սա Սեֆիլյանի նկատմամբ քաղաքական հաշվեհարդար է», – ասաց Բաղդասարյանը։
Հիշեցնենք, որ Ժիրայր Սեֆիլյանն ընդհանուր իրավասության դատարանի որոշման համաձայն դատապարտվեց 10 տարի 5 ամիս ազատազրկման։ Ժիրայր Սեֆիլյանը մեղադրվում էր մի խումբ անձանց հետ նախնական համաձայնությամբ, 2015 թվականի ապրիլի 24-ին Երևանում` բռնություն գործադրելով, գույք ոչնչացնելով և վնասելով, ինչպես նաև իշխանության ներկայացուցչին զինված դիմադրություն ցույց տալով զանգվածային անկարգություններ հրահրելու ուղղակի դիտավորությամբ, սկսած 2014 թվականի մայիսից կատարել է դրա կազմակերպմանն ուղղված նախապատրաստական գործողություններ։
2015 թվականի նոյեմբերից մինչև 2016 թվականի մայիսի 18-ն ընկած ժամանակահատվածում` կազմակերպված խմբի կազմում, Սեֆիլյանն ապօրինի կերպով ձեռք է բերել, պահել և փոխադրել հրազեն և ռազմամթերք` նպատակ ունենալով զենքի գործադրմամբ, կյանքի համար վտանգավոր բռնություն գործադրելով զավթել և պահել ռազմավարական նշանակության շենքեր, շինություններ:
