ԵՐԵՎԱՆ, 20 մարտի — Sputnik. 2008 թվականին մարտի 1, 2-ին Երևան քաղաքի կենտրոնում ՀՀ տասը քաղաքացիների սպանությունների մեղավորները հայտնաբերված չեն, և զոհերի հարազատներին չի վճարվել արդարացի փոխհատուցում: Այս հայտարարությամբ այսօր ՀՀ ԱԺ նիստում հանդես եկավ «Ելք» խմբակցությունը:
«Մինչ օրս փոխհատուցում ստացել են միայն մարտի 1-2-ին տուժած խանութների տերերը»,- հայտարարեց խմբակցության ղեկավար Նիկոլ Փաշինյանը:
Ընդդիմության բարձրացրած հարցին ի պատասխան իշխող «Հանրապետական» խմբակցության պատգամավոր Ռուստամ Մախմուդյանը հայտարարեց, որ տուժողները փոխհատուցում չեն ստացել, որովհետև նման հայց չեն ներկայացրել:
«Ընդամենը տուժողի իրավահաջորդները պետք է դատարան դիմեին: Բայց քանի դեռ մենք այս պահին մեր ձեռքի տակ չունենք մերժումներ կամ բավարարումներ, մենք արձանագրում ենք, որ այս մարդիկ այս պահի դրությամբ չեն դիմել», — ասաց Մախմուդյանը:
Արձագանքելով ներկայացրած պարզաբանմանը` «Ելք» խմբակցության պատգամավոր Էդմոն Մարուքյանը հայտարարեց, որ տուժած խանութների տերերից որևէ մեկը ժամանակին փոխհատուցում ստանալու հայցով դատարան չէր դիմել:
«Ընդամենը կառավարության որոշում էր կայացվել, և, եթե չեմ սխալվում, շուրջ 600 մլն դրամի փոխհատուցում էր տրամադրվել»,- ասաց Մարուքյանը:
«Ելք» խմբակցության պատգամավոր Արտակ Զեյնալյանն էլ հիշեցրեց, որ մարտի 1-2-ից հետո ամբողջ Հայաստանի տարածքում հայտարարվեց արտակարգ դրություն` չնայած օրենքի բացակայությանը, մտցվեց գրաքննություն, սահմանափակվեցին ԶԼՄ-ների աշխատանքը, խոսքի ազատությունը, քաղաքացիների ազատ տեղաշարժի իրավունքը:
Զեյնալյանը նշեց, որ ներկայացված հայտարարության նախագծով խմբակցությունը պահանջում է դատապարտել այդ օրերին տեղի ունեցածի մեղավորներին ու տալ իրավական գնահատական:
Ընդդիմության ներկայացուցիչները դարձյալ պահանջեցին, որ նախկին նախագահ Ռոբերտ Քոչարյանը հարցաքննվի քրեական գործի շրջանակում և պատասխանի մի շարք առկախված հարցերի:
«Ելքի» հեղինակած 2008թ. մարտի 1-2-ի իրադարձությունների վերաբերյալ հայտարարության նախագիծը քվեարկության կդրվի ԱԺ-ի վաղվա նիստում:
Հիշեցնենք, որ ընդդիմության նախագիծը մեկ ամիս առաջ մերժվել էր ԱԺ պետաիրավական հանձնաժողովի նիստում և բացասական եզրակացություն էր ստացել, բայց ավելի ուշ ՀՀԿ-ն որոշեց այն ընդգրկել նիստի նստաշրջանի օրակարգում:
2008 թվականի մարտի 1-2-ի դեպքերը տեղի ունեցան այն բանից հետո, երբ Լևոն Տեր-Պետրոսյանի համախոհները հրաժարվեցին ճանաչել նախագահական ընտրությունների արդյունքները։ Մի քանի հազար մարդ տասը օր գիշերեցին Ազատության հրապարակում։ Մարտի 1-ի առավոտյան նրանց ցրեց ոստիկանությունը։ Ցուցարարներին հետապնդեցին մինչև Մյասնիկյանի արձան, որտեղ էլ նրանց ուղղությամբ կրակ բացեցին։ Տասը մարդ զոհվեց, այդ թվում` երկու զինծառայող։ Մեղավորները մինչև այսօր չեն ստացել իրենց պատիժը։
