ԵՐԵՎԱՆ, 19 ապրիլի — Sputnik, Նելլի Դանիելյան. Եթե բերման ենթարկված անձինք 3 ժամ անց ազատ չեն արձակվում, ապա պետք է հասկանալ, որ նախաքննության մարմնի միջոցով ստուգվում է նրանց մասնակցությունը կատարված հանցագործություններին: Ոստիկանության տարածած այս հայտարարությունը նույնիսկ փաստաբանի համար է անհասկանալի։
«Բոլորին ասել, որ եթե 3 ժամը լրանում է, ուրեմն որոշակի գործողություն է կատարվում, ինձ համար, որպես փաստաբանի, անհասկանալի է»,– Sputnik Արմենիայի հետ զրույցում ասաց բերման ենթարկված քաղաքացիներին իրավաբանական անվճար օգնություն տրամադրող փաստաբանների խմբի համակարգող, փաստաբան Գևորգ Մկրտչյանը։
Նա նշեց, որ յուրաքանչյուր առանձին դեպքում իրավապահները պարտավոր են անհատական մոտեցում ցուցաբերել։ Նման պարագայում ընդհանուր ձևակերպումներն անընդունելի են։
«Ապրիլի 14-ին Արաբկիրից դժգոհություններ ունեինք, որ սահմանված ժամկետից ավելի են պահում` մինչև անգամ 7 ժամ»,– ասաց Մկրտչյանը` հավելելով, որ տեղեկատվությունը դեռ հավաքագրվում ու մշակվում ։ Ամբողջական պատկերը պարզ կլինի 1-2 օրից։
Փաստաբանների պալատում ձևավորված փաստաբանների խումբն արդեն 3 օր է, ինչ այցելում է ոստիկանական բաժանմունքներ, հանդիպում բերման ենթարկվածների հետ, պաշտպանում նրանց իրավունքները։
«Ինձ հետ խոսող ուսանողները հայտնեցին, որ նույնիսկ չեն հասցրել ոստիկանի պահանջը կատարել։ Պահանջ է ներկայացվել տարածքը լքելու ու հենց հաջորդ պահին նստեցրել են ավտոմեքենան ու բերման ենթարկել։ Այդ երեխաները նույնիսկ չեն հասցրել հասկանալ, որ պետք է տարածքն ազատեն»,– պատմեց Գևորգ Մկրտչյանը։
Բացի այդ, նրա խոսքով` ոստիկանները բաժին բերված անձանցից ոմանց որպես վկա են ներգրավում, ստիպում ցուցմունք տալ այս կամ այն դեպքի մասին։
Ապրիլի 17-ից մինչ օրս փաստաբանների պալատում շուրջ 20 ահազանգ է ստացվել։ Բայց եղել են դեպքեր, երբ մի ահազանգ է ստացվել, իսկ ոստիկանության բաժանմունք մեկնած փաստաբանը պարզել է, որ իրավաբանական օգնության կարիք ունեցողները 5-10 հոգի են։
Այսօր ժամը 11։00-ի դրությամբ փաստաբանների պալատ դիմել է մեկ քաղաքացի։
