ԵՐԵՎԱՆ, 20 ապրիլի — Sputnik. «Իմ քայլը» բողոքի ակցիայի մասնակիցներին ուղեկցում է Հայաստանի ոստիկանության պետի տեղակալ, գնդապետ Վալերի Օսպիյանը։
«Մենք արդեն միմյանց հանդիպելիս ուրախանում ենք», — ասաց Փաշինյանն Օսիպյանին, որը գնացել էր Գյուլբենկյան փողոց, որտեղ ցուցարարները սկզբից փակել էին փողոցը։
Ավելի վաղ Փաշինյանը կոչ էր արել իր կողմնակիցներին մայրաքաղաքի բոլոր փողոցները փակել բեռնատարներով, բոլոր հնարավոր տեխնիկայով։
Գյուբենկյան փողոց հասած Օսիպյանն իրեն բնորոշ զուսպ ժպիտով կրկին հարցրեց, թե նրանք ինչ են անում փողոցում։ Փաշինյանը պատասխանեց, որ բողոքի խաղաղ ակցիա են կազմակերպում։ Արդեն 8-րդ օրն է` Օսիպյանն այդ հարցը ուղղում է Փաշինյանին։
Տվյալ պահին Օսիպյանն ուղեկցում է ցուցարարներին, որոնք Դավթաշենի կամրջով շարժվում են դեպի Հանրապետության հրապարակ։ Ցուցարարներն արդեն կատակում են, ասում են` Օսիպյանն առաջին ոստիկանն է, որ իրենց կողմ է անցել։ Հետևաբար, ինչպես խոստացել են սփյուռքահայերը մի քանի օր առաջ, նա 10 հազար դոլար կստանա։
«Փողը ձեզ պահեք, իսկ ոստիկանները միշտ ժողովրդի կողքին են», — ասաց Օսիպյանը։
Նշենք, որ ապրիլի 17-ին Ազգային ժողովում անցկացված քվեարկության արդյունքում ՀՀ վարչապետ ընտրվեց Սերժ Սարգսյանը։ «Ելք» խմբակցության ղեկավար Նիկոլ Փաշինյան ու նրա կողմնակիցները դուրս են եկել Երևանի փողոցներ և բողոքում են այս ընտրության դեմ։
Փաշինյանը մարտի 31-ից Հայաստանի տարածքում նախաձեռնել է «Իմ քայլը» արշավը։ Մի քանի օրում Փաշինյանն իր համախոհների հետ ոտքով անցել է ավելի քան 200 կիլոմետր` ակցիաներ անցկացնելով Գյումրիում, Վանաձորում, Սպիտակում, Դիլիջանում, Աբովյանում և Հրազդանում։ Պատգամավորն ու նրա համախոհները բողոքում էին վարչապետի պաշտոնում Սերժ Սարգսյանի թեկնածության առաջադրման դեմ, սակայն նրանց բողոքը չխանգարեց, որ Ազգային ժողովը վարչապետ ընտրի հենց Սարգսյանին։
Երևանում քաղաքացիական անհնազանդության գործողությունները մեկնարկել են ապրիլի 16-ից։ Փաշինյանը հայտարարել է, որ թավշյա հեղափոխություն է իրականացնում։
