ԵՐԵՎԱՆ, 20 ապրիլի — Sputnik. Հայտնի բլոգեր և ճանապարհորդ Ալեքսանդր Լապշինը դարձել է «Arm Comedy» շոուի հերոս։
Լապշինը Երևան է եկել ապրիլի 20-22-ը զբոսաշրջային ցուցահանդեսին մասնակցելու համար։ Նա հասցնում է ոչ միայն զբոսնել քաղաքում և հետևել այս օրերին Երևանում ընթացող բողոքի ակցիաներին, այլ նաև մասնակցել հայտնի հումորային ծրագրին։
Նա այդ կապակցությամբ գրառում է հրապարակել իր բլոգում «Բաքուն ցնծում է. Լապշինին բռնել են հայերից փող ստանալու պահին» վերնագրով։
«Ես կարգին սայթաքել եմ և դավաճանել իմ հովանավորներին։ Հայ զինվորականներին արյունոտ փողեր փոխանցելիս բռնել են բլոգեր Լապշինին։ Հանցագործությունը տեղի է ունեցել «Arm Comedy» հայտնի հեռուստաշոուի ընթացքում, և Լապշինը չի կարողացել հերքել դա։ Աղետ։ Մաղադանոսի համաշխարհային գներն անկում են ապրել։ Իսկ եթե լուրջ, ապա հաղորդավարներ Սերգեյ Սարգսյանը և Նարեկ Մարգարյանը շատ լավ տղաներ են, մեծ հանաքչիներ ու հումորիստներ», — գրել է ճանապարհորդը։
Շոուի հաղորդավարները բլոգերի հետ կարճ, բայց ծիծաղելի հարցազրույց են անցկացրել տարբեր թեմաներով, որոնք վերաբերել են Բաքվի բանտում անցկացված ժամանակահատվածին։
«Հաղորդման ընթացքում խոսվում է այն մասին, թե ինչպես եմ ես դարձել Azerbaijan Airlines ուղևորների ակումբի անդամ, ինչպես եմ բոնուսային միավորներ պահանջել Մինսկից Բաքու նախագահական ինքնաթիռով թռիչք կատարելու համար, ինչու եմ ադրբեջանական բանտի զուգարանում այրել «Բաքվի բանվոր» թերթը և այլն։ Հաղորդումը հայերեն թարգմանությամբ է, բայց, կարծում եմ, որ գլուխ կհանեք։ Ուշադրություն դարձրեք, որ Սերգեյ Սարգսյանին հնչունավորողը կին է, իսկ իմ ձայնը կարդում է հենց Սերգեյը», — նշում է Լապշինը։
Հիշեցնենք` Լապշինը երեք տարվա ազատազրկման էր դատապարտվել առանց Ադրբեջանի իշխանության հետ համաձայնեցնելու Արցախ այցելելու համար։ 2016 թվականի վերջին Լապշինը Մինսկում ձերբակալվել էր Ադրբեջանի հարցման համաձայն: Բելառուսի գլխավոր դատախազությունը որոշում էր ընդունել Ադրբեջանի հարցումը բավարարելու և Լապշինին հանձնելու մասին: Լապշինը 3 տարվա ազատազրկման դատապարտվեց առանց Ադրբեջանի իշխանության հետ համաձայնեցնելու Արցախ այցելելու համար: Ավելի ուշ Ադրբեջանի նախագահ Իլհամ Ալիևը Լապշինին ներում շնորհելու մասին հրամանագիր ստորագրեց։
