ԵՐԵՎԱՆ, 20 ապրիլի — Sputnik. Ժամը 14:00-ի տվյալներով` Հայաստանում 166 մարդու են բերման ենթարկվել։ Այս մասին Sputnik Արմենիային հայտնեցին ոստիկանության մամուլի ծառայությունում։
Բերման են ենթարկում ոչ միայն ակցիայի մասնակիցներին, այն նաև վարորդներին, որոնք տարբեր փողոցներում միանում են ցուցարարներին։
Քաղաքի տարբեր փողոցներում այս պահին ակցիաներ են ընթանում, «Ելք» խմբակցության պատգամավոր Նիկոլ Փաշինյանի համախոհները փակում են այս կամ այն փողոցները։
Նշենք, որ ապրիլի 17-ին Ազգային ժողովում անցկացված քվեարկության արդյունքում ՀՀ վարչապետ ընտրվեց Սերժ Սարգսյանը։ «Ելք» խմբակցության ղեկավար Նիկոլ Փաշինյան ու նրա կողմնակիցները դուրս են եկել Երևանի փողոցներ և բողոքում են այս ընտրության դեմ։
Փաշինյանը մարտի 31-ից Հայաստանի տարածքում նախաձեռնել է «Իմ քայլը» արշավը։ Մի քանի օրում Փաշինյանն իր համախոհների հետ ոտքով անցել է ավելի քան 200 կիլոմետր` ակցիաներ անցկացնելով Գյումրիում, Վանաձորում, Սպիտակում, Դիլիջանում, Աբովյանում և Հրազդանում։ Պատգամավորն ու նրա համախոհները բողոքում էին վարչապետի պաշտոնում Սերժ Սարգսյանի թեկնածության առաջադրման դեմ, սակայն նրանց բողոքը չխանգարեց, որ Ազգային ժողովը վարչապետ ընտրի հենց Սարգսյանին։
Երևանում քաղաքացիական անհնազանդության գործողությունները մեկնարկել են ապրիլի 16-ից։ Փաշինյանը հայտարարել է, որ թավշյա հեղափոխություն է իրականացնում։
