ԵՐԵՎԱՆ, 21 ապրիլի — Sputnik. «Իմ քայլը» բողոքի շարժման առաջնորդ, պատգամավոր Նիկոլ Փաշինյանի գլխավորությամբ ցուցարարները բողոքի ակցիայի 9-րդ և քաղաքացիական անհնազանդության 6-րդ օրը մեկնարկեցին Նորքի 7-րդ զանգվածից։
Նախօրեին Փաշինյանը` ելույթ ունենալով Հանրապետության Հրապարակում հայտնել էր, որ քաղաքացիական անհնազանդության վեցերորդ օրը կմեկնարկի քաղաքի ծայրամասից։
Չնայած անձրևոտ եղանակին, ցուցարարները հավաքվել են։ Նրանց մոտենում են վահաններով և սաղավարտներով զինված ոստիկանները։
«Հարգելի ոստիկաններ, խնդրում եմ` ուղեկցեք մեզ», — դիմեց ոստիկաններին Փաշինյանը։
Ցուցարարները բղավում են` «միացեք»։
Առավոտվանից զանգվածային ցույցերը տեղափոխվել են Երևանի ծայրամաս, քաղաքի տարբեր հատվածներում բնակիչները իրենց համերաշխությունն են հայտնում «Իմ քայլը» շարժման կազմակերպիչ, ընդդիմադիր պատգամավոր Նիկոլ Փաշինյանի հետ։
Ցուցարարների թիվը մեծացել է, իսկ ակցիայի աշխարհագրությունը` ընդլայնվել։
Ցուցարարներին են միացել նաև մի քանի բեռնատարների վարորդներ, որոնք իրենց բեռնատարներով փակել են Երևանի մի քանի հիմնական խաչմերուկները։
Երեկ, 18:00-ի դրությամբ բերման ենթարկվածների թիվը հասել էր 233-ի։ Երեկոյան բոլորին ազատ էին արձակել։
Ապրիլի 17-ին Ազգային ժողովում անցկացված քվեարկության ժամանակ ՀՀ վարչապետ ընտրվեց Սերժ Սարգսյանը։ «Ելք» խմբակցության ղեկավար Նիկոլ Փաշինյան ու նրա կողմնակիցները դուրս են եկել Երևանի փողոցներ և բողոքում են այս ընտրության դեմ։
Փաշինյանը մարտի 31-ից Հայաստանի տարածքում նախաձեռնել է «Իմ քայլը» արշավը։ Մի քանի օրում Փաշինյանն իր համախոհների հետ ոտքով անցել է ավելի քան 200 կիլոմետր` ակցիաներ անցկացնելով Գյումրիում, Վանաձորում, Սպիտակում, Դիլիջանում, Աբովյանում և Հրազդանում։ Պատգամավորն ու նրա համախոհները բողոքում էին վարչապետի պաշտոնում Սերժ Սարգսյանի թեկնածության առաջադրման դեմ, սակայն նրանց բողոքը չխանգարեց, որ Ազգային ժողովը վարչապետ ընտրի հենց Սարգսյանին։ Երևանում քաղաքացիական անհնազանդության գործողությունները մեկնարկել են ապրիլի 16-ից։ Փաշինյանը հայտարարել է, որ թավշյա հեղափոխություն է իրականացնում։
