ԵՐԵՎԱՆ, 21 ապրիլի — Sputnik. Ոստիկանները փակել են քաղաքի գլխավոր փողոցներից մեկը` Բաղրամյան պողոտան, որը տանում է դեպի ՀՀ ազգային ժողովի շենք։ Այս մասին հայտնում է Sputnik Արմենիայի թղթակիցը։
«Բաղրամյանի պողոտան ոստիկանությունը փակել է փշալարերով։ Հետևում ջրցան մեքենաներ են կանգնած», — տեղեկացնում է մեր թղթակիցը։
Բողոքի ակցիաներ են անցկացվում ոչ միայն Հայաստանի մայրաքաղաքում, այլև մի շարք այլ քաղաքներում։ ՀՀ որոշ մարզերից քաղաքացիները փորձում են մայրաքաղաք հասնել։
Ոստիկանությունը լրացուցիչ ուժեր է բերել Երևանի Մաշտոցի պողոտա։
Առավոտվանից զանգվածային ցույցերը տեղափոխվել են Երևանի ծայրամաս, հավաքը մեկնարկել է Նոր Նորքից։ Ավելի ուշ Փաշինյանը փոխեց գործողությունների ծրագիրը։ Ոստիկանության ճնշման տակ, որը ակցիան ապօրինի անվանեց, Փաշինյանը չեղյալ հայտարարեց առավոտվա հավաքը և տեղեկացրեց ոստիկանությանը նոր քայլերթի մեկնարկի մասին։ Քաղաքի տարբեր հատվածներում բնակիչներն իրենց աջակցությունն են հայտնում «Իմ քայլը» շարժման կազմակերպիչ, ընդդիմադիր պատգամավոր Նիկոլ Փաշինյանի հետ։
Ապրիլի 17-ին Ազգային ժողովում անցկացված քվեարկության ժամանակ ՀՀ վարչապետ ընտրվեց Սերժ Սարգսյանը։ «Ելք» խմբակցության ղեկավար Նիկոլ Փաշինյանն ու նրա կողմնակիցները դուրս են եկել Երևանի փողոցներ և բողոքում են այս ընտրության դեմ։
Փաշինյանը մարտի 31-ից Հայաստանի տարածքում նախաձեռնել է «Իմ քայլը» արշավը։ Մի քանի օրում Փաշինյանն իր համախոհների հետ ոտքով անցել է ավելի քան 200 կիլոմետր` ակցիաներ անցկացնելով Գյումրիում, Վանաձորում, Սպիտակում, Դիլիջանում, Աբովյանում և Հրազդանում։ Պատգամավորն ու նրա համախոհները բողոքում էին վարչապետի պաշտոնում Սերժ Սարգսյանի թեկնածության առաջադրման դեմ, սակայն նրանց բողոքը չխանգարեց, որ Ազգային ժողովը վարչապետ ընտրի հենց Սարգսյանին։ Երևանում քաղաքացիական անհնազանդության գործողությունները մեկնարկել են ապրիլի 16-ից։ Փաշինյանը հայտարարել է, որ թավշյա հեղափոխություն է իրականացնում։
