ԵՐԵՎԱՆ, 21 ապրիլի — Sputnik. ՀՀ նախագահ Արմեն Սարգսյանը պատրաստ է հանդիպել Նիկոլ Փաշինյանին` առկա լարվածությունը քաղաքական ուժերի երկխոսության միջոցով մեղմելու նպատակով։ Այս մասին ասված է նրա աշխատակազմի տարածած հայտարարության մեջ։
«Օդի մեջ կախված անհանդուրժողականությունը հասել է գագաթնակետին: Ինձ խորապես անհանգստացնում է երկխոսության առաջարկի մերժումը, որը կարող է հանգեցնել առճակատման: Ուստի դիմում եմ բոլորին՝ մի պահ կանգ առնել և սթափ մտածել, թե ինչ հետևանքների կարող է հանգեցնել այս դիմակայությունը»,- հայտարարել է նախագահը` հավելելով, որ առաջարկը քաղաքական կոչ չէ, այլ ծնողի, բարեկամի, հայ մարդու դիմում:
Արմեն Սարգսյանը կոչ է անում դուրս չգալ Հայաստանի քաղաքացու իրավունքների և պարտականությունների, ինչպես նաև` պաշտոնական իրավասությունների շրջանակից:
«Չեն լինելու հաղթողներ և պարտվողներ, տուժելու ենք բոլորս, տուժելու է երկիրը»,- ասել է նա` անհրաժեշտ համարելով լարվածությունը պարպելն ու կողմերին բաժանող անջրպետը կամրջելը:
Ապրիլի 17-ին Ազգային ժողովում անցկացված քվեարկության ժամանակ ՀՀ վարչապետ ընտրվեց Սերժ Սարգսյանը։ «Ելք» խմբակցության ղեկավար Նիկոլ Փաշինյանն ու նրա կողմնակիցները դուրս են եկել Երևանի փողոցներ և բողոքում են այս ընտրության դեմ։
Փաշինյանը մարտի 31-ից Հայաստանի տարածքում նախաձեռնել է «Իմ քայլը» արշավը։ Մի քանի օրում Փաշինյանն իր համախոհների հետ ոտքով անցել է ավելի քան 200 կիլոմետր` ակցիաներ անցկացնելով Գյումրիում, Վանաձորում, Սպիտակում, Դիլիջանում, Աբովյանում և Հրազդանում։ Պատգամավորն ու նրա համախոհները բողոքում էին վարչապետի պաշտոնում Սերժ Սարգսյանի թեկնածության առաջադրման դեմ, սակայն նրանց բողոքը չխանգարեց, որ Ազգային ժողովը վարչապետ ընտրի հենց Սարգսյանին։ Երևանում քաղաքացիական անհնազանդության գործողությունները մեկնարկել են ապրիլի 16-ից։ Փաշինյանը հայտարարել է, որ թավշյա հեղափոխություն է իրականացնում։
