ԵՐԵՎԱՆ, 23 ապրիլի — Sputnik. Առաջնագծում վիճակի մասին եղել է հաղորդագրություն, եղել է տեսանյութ, կարծում եմ` ոչ մեկի մտքով չի անցնում, որ դա կարող էր կեղծված լինել։ Այսօր` լրագրողների հետ հանդիպմանը, պատասխանելով առաջնագծում ադրբեջանական զինուժի կուտակման լուրերի մասին հարցին, ասաց ՀՀ պաշտպանության նախարար Վիգեն Սարգսյանը։
«Հակառակորդը հետևում է զարգացող իրադարձություններին և հասկանալի է, որ մեր ներքին անկայունությունն ուղիղ ճանապարհ է հարթում` նրանց կողմից գործողություններ ձեռնարկելու»,– ասաց Սարգսյանը` հավելելով, որ որպես պետական, պատասխանատու մարմին, ՊՆ–ը պարտավոր էր այդ մասին զգուշացնել հասարակությանը։
«Հակառակորդը հետևում է, և, եթե տեսնում է, որ դու ներսում ունես ներքին գործընթացներ, որոնք քեզ զբաղված են պահում ներսում, դրսի սահմանի վրա հնարավոր է փորձել որևէ այլ բան։ Երկրորդ` երբ քեզ մոտ արգելափակված է ներքին կառավարման համակարգը, ճանապարհներն են փակված, ակնհայտ է, որ քո պաշտպանական գործառույթը բարդանում է»,– ասաց Սարգսյանը։
Հիշեցնենք, երեկ ՊՆ–ը հայտարարել էր, որ հակառակորդը շփման գծում զինտեխնիկա է կուտակում։ Տարածվել էր նաև հայտարարությունը հաստատող տեսանյութ։
