ԵՐԵՎԱՆ, 23 ապրիլի — Sputnik. ՀՀ կառավարության կազմն ամբողջացավ` առանց վարչապետի։ ՀՀ վարչապետի հրաժարականի մասին պաշտոնական հայտարարությունից հետո ՀՀ նախագահը նշանակեց կառավարության անդամների թափուր մնացած բոլոր պաշտոնների նոր տերերին։
Բնապահպանության նախարարի պաշտոնում վերանշանակվեց Արծվիկ Մինասյանը, Տրանսպորտի, կապի և տեղեկատվական տեխնոլոգիաների նախարարի պաշտոնում վերանշանակվեց Վահան Մարտիրոսյանը, ԿԳ նախարարի պաշտոնում` Լևոն Մկրտչյանը, Սպորտի և երիտասարդության հարցերի նախարարի պաշտոնում` Հրաչյա Ռոստոմյանը։
Մինչ այդ այսօր վերանշանակվել էին նաև Առողջապահության նախարար Լևոն Ալթունյանը, Աշխատանքի և սոցիալական հարցերի նախարար Արտեմ Ասատրյանը, Սփյուռքի նախարար Հրանուշ Հակոբյանը և Էներգետիկ ենթակառուցվածքների ու բնական պաշարների նախարար Աշոտ Մանուկյանը։
Այսպիսով ՀՀ կառավարության բոլոր 17 անդամներն արդեն նշանակված են։ Կառավարության կազմը համալրված է, բայց այն այլևս չունի ղեկավար։