ԵՐԵՎԱՆ, 24 ապրիլի — Sputnik. Ցեղասպանությունը միայն խոսքերով ճանաչելը քիչ է,` պետք է քրիստոնյաներին վերադարձնել եկեղեցիներն ու վանքերը։ Այս մասին ասել է Ն.Ս.Օ.Տ.Տ. Արամ Ա Մեծի Տանն Կիլիկիո Կաթողիկոսը, որի ուղերձը հրապարակվել է L"Orient — Le Jour լիբանանյան թերթում։
«Նույնիսկ Թուրքիայի քաղաքացիական հասարակության մեջ արդեն ոչ ոք Ցեղասպանության մասին չի խոսում որպես «Համաշխարհային առաջին պատերազմի տխուր իրադարձությունների»։ Իրերն արդեն վաղուց իրենց անուններով են կոչում», — գրված է ուղերձում։
Նրա խոսքով` Ցեղասպանությունից հետո ողջ մնացածները վերածնել են իրենց երկիրը։ Կաթողիկոսը նշել է, որ հայ ժողովուրդն արդարության կոչ է անում, և այժմ ժողովրդի օրինական պահանջն է ոչ միայն ճանաչումը, այլև փոխհատուցումը։
«Այդ պատճառով ես` որպես հոգևոր առաջնորդ, հարցնում եմ Թուրքիային` ինչո՞ւ են հազարավոր, վանքեր ու դպրոցներ շարունակում մնալ թուրքական իշխանության ապօրինի սեփականությունը։ Ինչո՞ւ է Թուրքիայի սահմանադրական դատարանը հրաժարվել անգամ ուսումնասիրել Կիլիկիո տան հայկական կաթողիկոսարանի բողոքը` կապված Սիսում (ներկայիս` Կոզան) հայկական եկեղեցու պատմական նստավայրի գույքը վերադարձնելու հետ», — ասել է կաթողիկոսը։
Նա հայտնել է, որ այդ եկեղեցիների և վանքերի վերադարձը կարող է առաջին քայլը դառնալ փոխհատուցման ճանապարհին։
«Մենք անսահման երախտապարտ ենք մեր արաբ եղբայրներին ու քույրերին, քրիստոնյաներին ու մուսուլմաններին, որոնք ընդունել են հայ փախստականներին և որբերին, արժանապատվությամբ ու անշահախնդրությամբ, որոնք կարող են օրինակ ծառայել ամբողջ աշխարհի համար», — ընդգծել է Արամ Ա-ն։
Նա նաև նշել է, որ լիբանանցիներն ու հայերը երբեք չեն մոռանա Օսմանյան կայսրության ռազմական նախարար Էնվեր փաշայի խոսքերը. «Օսմանյան կայսրությունը պետք է ազատել հայերից ու լիբանանցիներից։ Առաջիններին մենք թրով ոչնչացրինք, երկրորդներին կոչնչացնենք սովով»։
«1915-18 թվականների մեծ սովը, որը խլեց Լիբանանի բնակչության կեսի կյանքը, չի մոռացվել։ Համագոյությունն առաջընթացի և խաղաղության աղբյուր է, եթե այն հիմնված է արդարության վրա։ Դա էլ հենց սպասում ենք Թուրքիայից», — գրված է ուղերձում։
Ավելի վաղ` ապրիլի 20-ին, Ն.Ս.Օ.Տ.Տ. Գարեգին Բ Ամենայն Հայոց Կաթողիկոսն ու Ն.Ս.Օ.Տ.Տ. Արամ Ա Մեծի Տանն Կիլիկիո Կաթողիկոսը քննարկել էին զանգվածային բողոքի ցույցերը։ Ընդ որում, Արամ Ա-ն հատուկ Անթիլիասից Հայաստան էր ժամանել մի քանի ժամով։
Հիշեցնենք, որ ապրիլի 24-ը Հայոց ցեղասպանության օրն է։ Այդ հանցագործությունը ճանաչել են աշխարհի 25 երկիր, իսկ Թուրքիան մինչև այսօր էլ չի ընդունում այն։
