ԵՐԵՎԱՆ, 24 ապրիլի — Sputnik. ԵԽԽՎ-ն հուսով է, որ Հայաստանի քաղաքական ուժերի միջև կառուցողական երկխոսություն կլինի։ Այս մասին գրված է ԵԽԽՎ զեկուցողների հայտարարության մեջ:
Եվրախորհրդի խորհրդարանական վեհաժողովի Հայաստանի հարցով համազեկուցողներ Ջուզեպե Գալատին (Իտալիա) ու Յուլյա Լևոչկինան (Ուկրաինա) նշում են, որ ողջունում են վարչապետ Սերժ Սարգսյանի` պաշտոնից հրաժարվելու համարձակ որոշումը՝ երկրում աճող լարվածությունը մեղմելու նպատակով:
«Հուսով ենք, որ այս ամենը կհանգեցնի նոր և կառուցողական երկխոսության երկրի բոլոր քաղաքական ուժերի միջև՝ նպատակ ունենալով գտնել տիրող իրավիճակի վերաբերյալ տևական լուծում՝ համաձայն սահմանադրական համապատասխան դրույթների», — գրված է ուղերձում։
Նրանք նաև կոչ են անում ազատ արձակել բոլոր այն մարդկանց, որոնք ավելի վաղ բերման էին ենթարկվել Երևանի ցույցերին մասնակցելու համար։
Հիշեցնենք` Երևանում 10 օր տևած բողոքի ակցիաներից հետո երեկ` ապրիլի 23-ին, ՀՀ վարչապետ Սերժ Սարգսյանը հրաժարական տվեց։ Օրեր շարունակ տասնյակ հազարավոր մարդիկ ցույցերի էին դուրս եկել` բողոքելով Սերժ Սարգսյանի իշխանության երկարացման դեմ (2008 թվականից նա ղեկավարում էր երկիրը որպես նախագահ, իսկ ապրիլի 17-ին խորհրդարանն ընտրել էր նրան որպես վարչապետ ու պետության փաստացի ղեկավար)։
ՀՀ վարչապետ Սերժ Սարգսյանի հրաժարականից հետո ՀՀ նախագահ Արմեն Սարգսյանն ընդունեց նաև կառավարության հրաժարականը։ Այս պահին կառավարության ղեկավարի պարտականություններն իրականացնում է Կարեն Կարապետյանը։ Նախարարները շարունակում են աշխատել ժամանակավոր պաշտոնակատարների կարգավիճակով։ Նոր վարչապետի ընտրություններն ԱԺ-ում նախատեսվում են հաջորդ շաբաթ։