ԵՐԵՎԱՆ, 1 մայիսի — Sputnik. Տարբեր կուսակցություններից, տարբեր աշխարհագրական կենտրոններից, տարբեր պատգամավորներից ու տարբեր կառույցներից ինձ առաջարկներ են եղել վարչապետի թեկնածու առաջադրելու, բայց ես հարգում եմ իմ ժողովրդին և իմ ժողովրդի որոշումը։ Այս մասին այսօր Ազգային ժողովում լրագրողներին ասաց «Ծառուկյան» դաշինքի ղեկավար Գագիկ Ծառուկյանը։
«Իմ ժողովրդի ցավը տանեմ, միասնականությունը միշտ էլ հաղթում է։ Ում կվստահի ժողովուրդը, նրան էլ թող տան»,–նշեց Ծառուկյանը, միաժամանակ` դու սուս, Նառա ասելով` ընդհատելով իր ու լրագրողների խոսակցությունը հարթել ցանկացող պատգամավոր Նաիրա Զոհրաբյանին։
Անդրադառնալով արտահերթ ընտրությունների խնդրին` Գագիկ Ծառուկյանը նշեց, որ իրենք միշտ պատրաստ ենք եղել արտահերթ ընտրությունների, հիմա առավել ևս` պատրաստ են։
Նրա խոսքով Սերժ Սարգսյանի` վարչապետի պաշտոնում քվեարկության ժամանակ իրենց կուսակցությունում քննարկումներ են եղել, ապա որոշում է կայացվել։ «Եթե ես որոշում կայացնեի, որ բոլորը միաձայն պիտի քվեարկվեն, մի պատգամավոր չէր հակառակվի, որովհետև մենք մի ընտանիք ենք»,–հավելեց նա։
Հիշեցնենք, որ Սերժ Սարգսյանի` վարչապետի ընտրության քվեարկության ժամանակ «Ծառուկյան» դաշինքի որոշ պատգամավորներ դեմ էին քվեարկել։
Լրագրողների հարցին, թե իրենց կուսակցությունը ժողովրդական այս շարժմանը միացել է, երբ արդեն տեսանելի էր հաղթանակը, Գագիկ Ծառուկյանը նախ լրագրողներին խորհուրդ տվեց ուշադիր հետևել իրադարձություններին, ապա պատասխանեց. «Ժողովրդական շարժմանը Ծառուկյանը հետևել է, Ծառուկյանը քաղաքական փորձ ունի։ Մեր կուսակցությունում ով ցանկացել է, գնացել է հանրահավաքների։ Պատգամավորների կալանման օրը Ծառուկյանը քաղաքական որոշում է կայացրել, որ պաշտպանում է պատգամավորներին, որ չպետք է նրանց անձեռնմխելիությունը վերցնեն։ Իմ հայտարարությունից հետո քաղաքական իրադարձություն փոխվեց»։
Հիշեցնենք, որ Փաշինյանը վարչապետի պաշտոնի միակ թեկնածուն է։ Անցած գիշեր նա իր տեսաուղերձում հայտնել է, որ ՀՀԿ մտադիր է ձախողել նրա ընտրությունը։ Նա կոչ է արել իր կողմնակիցներին «հարյուր հազարներով հավաքվել Հանրապետության հրապարակում»` հույս ունենալով, որ մարդկանց ակտիվությունը կխափանի ՀՀԿ–ի ծրագրերը։
Փաշինյանի թեկնածությունն ապրիլի 30-ին առաջադրել է «Ելք» խմբակցությունը։ Սակայն ընդդիմադիրը վարչապետ դառնալու համար պետք է ստանա 53 ձայն 105 ձայնից։ Հետևաբար, նրա համար պետք է քվեարկեն ոչ միայն «Ելք» խմբակցությունը, «Ծառուկյան» դաշինքն ու ՀՅԴ–ն, այլև ՀՀԿ իշխող կուսակցության պատգամավորների մի մասը։
ՀՀ խորհրդարանը վարչապետի ընտրության հարցը կքննարկի այսօր` մայիսի 1-ին։ Ավելի վաղ ՀՀԿ մամուլի քարտուղար, խորհրդարանի փոխխոսնակ Էդուարդ Շարմազանովը հայտնել էր, որ խմբակցությունը կհայտարարի իր դիրքորոշման մասին Փաշինյանի ծրագիրը լսելուց հետո։
