ԵՐԵՎԱՆ, 3 մայիսի – Sputnik. Բժիշկներին չի հաջողվել փրկել ավազակային հարձակման հետևանքով հրազենային վնասվածք ստացած ոստիկանի կյանքը։ Այս մասին հայտնում է Ոստիկանության տեղեկատվության ու հասարակայնության հետ կապերի վարչության պետ Աշոտ Ահարոնյանը։
Ծառայողական պարտականությունները կատարելիս զոհված ոստիկանը ավագ ենթասպա Արա Շախգուլյանն էր, երկու երեխաների հայր։
Շախգուլյանը 2000 թվականից ՊՊԾ ջոկի հրամանատարն էր։
Հիշեցնենք, որ մայիսի 3-ին, ժամը 14.25-ի սահմանում ոստիկանությունն ահազանգ է ստացել, որ HSBC բանկի` Կոմիտասի պողոտա-Գյուլբենկյան փողոց խաչմերուկում գտնվող մասնաճյուղի վրա ավազակային հարձակում է կատարվել:
Պարզվել է, որ ավազակային հարձակում կատարած անձը, դանակով, նռնակով, հրացանով զինված, ներխուժել է բանկ, վիրավորել երկու աշխատակցի, որոնցից մեկը մահացել է:
Ավազակային հարձակում կատարած անձը հափշտակել է գումար ու դիմել փախուստի: Սակայն հեռու փախչել չի հաջողվել:
Անհապաղ դեպքի վայր ժամանած օպերատիվ խմբի կողմից շրջափակվելով` նա դիմադրություն է ցույց տվել, վիրավորել ոստիկաններից մեկին, սակայն վնասազերծվել ու տեղափոխվել է ոստիկանություն:
Ըստ ոստիկանության տարածած հաղորդագրության` հանցագործություն կատարած անձը Ճանապարհային ոստիկանության տեսանկարահանման միջոցով հայտնաբերված խախտումների արձանագրման կենտրոնի պետ, ոստիկանության գնդապետ Դանիել Դանիելյանն է:
