ՀՅԴ խմբակցության քարտուղար Աղվան Վարդանյանը՝ անդրադառնալով պատգամավորական մանդատից հրաժարվելու, ինչպես նաև ՀՀ առաջին նախագահ Լևոն Տեր-Պետրոսյանի հայտարարությանը, թե Սահմանադրության համաձայն պատգամավորն առաջնորդվում է իր խղճով և համոզմունքով, և նրան պարտադրել այս կամ այն որոշումը հակասահմանադրական է, նշել է, որ դա իր որոշումն է:
Նա հայտարարություն է տարածել, որում էլ ներկայացրել է իր դիտարկումները՝ կապած տեղի ունեցածի հետ:
«Մայիսի 1-ից օրեր առաջ լրագրողները պարբերաբար հարցնում էին՝ ինչպե՞ս եք քվեարկելու։ Միշտ պատասխանել եմ՝ բացեք ՀՀ Սահմանադրության 94 հոդվածը։ Քվեարկելու եմ խղճով ու համոզմունքներով։ Ասածս հրապարակված է։
Այնպես որ, Լևոն Տեր-Պետրոսյանի հիշեցրածը գիտեմ։ Բայց ես ինքս եմ ելույթում հայտարարել, որ պատրաստ եմ վայր դնել մանդատս, ինչը և հաջողությամբ արել եմ»,- նշված է հայտարարության մեջ։
Աղվան Վարդանյանը նաև նշել է, թե տեղյակ է, որ կարող է չվերահաստատել ԱԺ նախագահին գրած դիմումն ու մնալ պատգամավոր։ Բայց այդպես չի վարվի, քանի որ սահմանադրականից զատ, կա խնդրի բարոյական կողմը։
«Այո, Տեր-Պետրոսյանը ճիշտ է։ Բայց ես ավելի ճիշտ եմ»,- իր հայտարարությունը եզրափակել է նախկին պատգամավորը։
Հիշեցնենք, որ մայիսի 1-ին կայացած ՀՀ վարչապետի ընտրության քվեարկության ժամանակ ՀՅԴ պատգամավոր Աղվան Վարդանյանը` անտեսելով կուսակցության որոշումը, դեմ էր քվեարկել Նիկոլ Փաշինյանի թեկնածությանը։ Դրանից հետո ՀՅԴ խմբակցությունը պահանջել էր նրանից վայր դնել մանդատը։
