ԵՐԵՎԱՆ, 23 մայիսի — Sputnik. Ալմուլսարի հանքի դեմ բողոքող քաղաքացիների ու լրագրողների հետ հանդիպման ընթացքում ՀՀ նախագահ Արմեն Սարգսյանն անդրադարձավ նախագահի նստավայրում առկա թափուր աշխատատեղերի հարցին։
«Մենք ունենք 22 աշխատողի թափուր տեղ,- ասաց Սարգսյանը և ավելացրեց, — այսօրվա վիճակով 3600 մարդ արդեն դիմել է»։
Հայաստանի Հանրապետության նախագահի պաշտոնական կայքում հրապարակված հայտարարության համաձայն` նախագահի աշխատակազմին անհրաժեշտ են նախագահական նախաձեռնությունների վարչության պետ, սփյուռքի հետ կապերի բաժնի պետ, մշակութային և կրթական նախաձեռնությունների բաժնի խորհրդատու, նույն բաժնի գխավոր մասնագետ, սփյուռքի հետ կապերի բաժնի գլխավոր մասնագետ, մշակութային և կրթական նախաձեռնությունների բաժնի առաջատար մասնագետ, սփյուռքի հետ կապերի բաժնի առաջին կարգի մասնագետ, տեղեկատվական կառավարման վարչության պետ, արարողակարգի վարչության գլխավոր մասնագետ, անձնակազմի կառավարման և պետական պարգևների վարչության պարգևների և կոչումների գլխավոր բաժնի գլխավոր մասնագետ, նույն վարչության կադրերի բաժնի առաջատար մասնագետ, տեղեկատվական կառավարման վարչության ընդհանուր բաժնի առաջատար մասնագետ, արձանագրային բաժնի առաջատար մասնագետ, տնտեսական և հաշվապահական հաշվառման վարչության հաշվապահական բաժնի առաջատար մասնագետ-գանձապահ, արտաքին կապերի վարչության առաջատար մասնագետ, իրավաբանական վարչության իրավական ապահովման բաժնի երկրորդ կարգի մասնագետ, ներքին աուդիտի բաժնի պետ, նույն բաժնի գլխավոր մասնագետ, հասարակայնության հետ կապերի վարչության գլխավոր մասնագետ, առաջին ու երկրորդ կարգի մասնագետներ:
Ի դեպ, թեև ՀՀ նախագահն այսօր ասաց, որ այս 20 թափուր պաշտոններից յուրաքանչյուրի համար միջին հաշվով արդեն 180 դիմում է ստացվել, բայց դիմումատուների համար սահմանված ժամկետն ավարտված չէ։
Քաղաքացիները կարող են դիմել մինչև մայիսի 31-ը։
Արմեն Սարգսյանը նշեց, որ իրենց նպատակն է ՀՀ նախագահի նստավայրը դարձնել առավելագույնս թափանցիկ կառույց, որի դարպասները չպիտի խոչընդոտ լինեն ՀՀ քաղաքացիների հետ կապին։
