ԵՐԵՎԱՆ, 24 մայիսի — Sputnik. Քաղաքացին առավոտյան տնից դուրս է գալիս, ասում ենք` որտեղ բռնենք, տուգանենք այս մարդուն։ Այսօր կառավարության նիստում անդրադառնալով ճանապարհային երթևեկության կանոնների խախտումների տուգանքների համաներման հարցին`ասաց ՀՀ վարչապետ Նիկոլ Փաշինյանը։
«Պետք է հասկանանք, որ քաղաքացին, կներեք այս բառիս համար, տուգանվելու մատերիալ չէ։ Այս մտածողությունը պետք է փոխվի։ Բայց այն չպիտի հակադրվի անվտանգության հարցերին»,- ասաց Փաշինյանը։
ՀՀ ոստիկանապետ Վալերի Օսիպյանն, անդրադառնալով տուգանքների համաներման մասին որոշմանը, նշեց, որ կան նաև դժգոհություններ։
«Բարեխիղճ քաղաքացիները, ովքեր վճարել են, ասում են՝ վերադարձրեք մեր գումարները, տարբեր կարծիքներ կան համացանցում, հիմա պետք է մենք փորձենք բացատրել եղելությունը ու մեր կայացրած այս որոշման հետևանքները», — ասաց Օսիպյանը։
Նիկոլ Փաշինյանն էլ արձագանքեց, որ պետք է տեսակետները քննարկել ու կայացնել հավասարակշռված որոշում։
Օսիպյանը նաև տեղեկացրեց, որ այն օրերին, երբ հայտարարվել էր տեսախցիկների աշխատանքը դադարեցնելու մասին, ՃՏՊ-ների դեպքերից մահվան վիճակագրությունն ավելացել էր, իսկ երբ հակառակ հայտարարությունն արվեց, նույն վիճակագրությունը նվազեց։
Նիկոլ Փաշինյանը հանձնարարեց կառավարության պատասխանատու անդամներին բազմակողմանի քննարկել խնդիրն ու ընդունել երկուստեք ընդունելի որոշում։
