ԵՐԵՎԱՆ, 29 մայիսի — Sputnik. Ալեքսանդր Սարգսյանը Հայաստանից կապիտալ դուրս չի բերել, երեքշաբթի ԱԺ-ում լրագրողներին հայտնեց Կենտրոնական բանկի ղեկավար Արթուր Ջավադյանը։
Ալեքսանդր Սարգսյանը (հայտնի է որպես Սաշիկ Սարգսյան) Հայաստանի նախկին նախագահ Սերժ Սարգսյանի եղբայրն է, նախկին պատգամավոր և, որոշ տվյալներով, թանկարժեք անշարժ գույք ունի Հայաստանում և ԱՄՆ-ում։
Ջավադյանն անհիմն համարեց լուրերն այն մասին, թե օլիգարխները նոր կառավարության օրոք սկսեցին գումարները զանգվածաբար դուրս բերել Հայաստանից։ Եթե երկրից դուրս բերեին խոշոր ներդրումները կամ այլ գումարներ, դա անմիջապես կնկատեին ֆինանսական կարգավորիչները ինչպես Հայաստանում, այնպես էլ արտերկրում։
«Դրան հետևում են` փողերի լվացման և ֆինանսական ահաբեկչության հետ պայքարելու համար։ Այդ պատճառով խոշոր գումարների տեղաշարժն անմիջապես հայտնվում է կարգավորիչների ուշադրության կենտրոնում։ Եվ եթե կապիտալի նման արտահոսք լիներ, այդ մասին կիմանայինք նաև մենք, և այն երկրների մեր գործընկերները, ուր կգնային այդ գումարները։ Սակայն նման բան տեղի չի ունեցել», — ասաց Ջավադյանը։
Նրա խոսքով` ապրիլ-մայիս ամիսներին բանկային ներդրումների պայմանագրերի դադարեցում իսկապես նկատվեց, բայց զանգվածային բնույթ չկրեց և շուտով դադարեց։ Իսկ այժմ արդեն կարելի է ասել, որ բանկային համակարգում հավասարակշռությունը վերականգնվել է։
