ԵՐԵՎԱՆ, 30 մայիսի — Sputnik. Ծխելը վնասակար սովորություն է, որից հայերը պետք է ձերբազատվեն, քանի որ ուրիշ ելք չկա։ Այս մասին այսօր Առանց ծխախոտի համաշխարհային օրվան նվիրված մամուլի ասուլիսում ասաց առողջապահության նախարար Արսեն Թորոսյանը։
Նախարարը խոստովանեց, որ Հայաստանում ծխելու դեմ պայքարի ծրագրերը շարունակում են մնալ թղթի վրա։
«Մենք ամեն օր քննարկում ենք այդ վնասակար սովորության լուրջ հետևանքները և վստահ ենք, որ ծխելը պետք է թողնել», – ասում է Թորոսյանը։
Հայաստանում ծխելու դեմ պայքարի ռազմավարությունն արդեն մշակվել և հաստատվել է կառավարության կողմից, բայց միջոցները, որոնք ընդունվել են մինչև հիմա, բավարար չեն։
2010-2015թթ–ին ծխելու դեմ պայքարի պետական ծրագիրը նախատեսում էր տարեկան 1,5-2 տոկոսով ծխողների թվի կրճատում, սակայն վիճակագրությունը հակառակն է ցույց տալիս. մեր երկրում ծխողների թիվն ավելացել է։
Ակտիվ ծխողների շարքում են ինչպես տղամարդիկ, այնպես էլ կանայք, միաժամանակ կանանց մեծամասնությունը նախընտրում է թաքուն ծխել, ավելացրեց նախարարը։
Պատասխանելով Sputnik Արմենիայի հարցին ծխելու դեմ պայքարի մեթոդների մասին` նա նշեց, որ պետք է կիրառել այլ երկրների փորձը` տուգանքներ, քարոզչություն, ծխախոտից կախվածություն ունեցողներին օգնություն, դպրոցներում և բուհերում կրթական ծրագրերի իրագործում։
Բացի այդ, պետք է կիրառել բոլոր գործիքները` հասարակական վայրերում ծխելու դեմ պայքարի համար, որպեսզի հնարավորինս արագ հասնենք դրական արդյունքների։
«Չէ՞ որ մեր երկրում ծխում է յուրաքանչյուր երկրորդ տղամարդը։ Դա բարձր տոկոս է», – նշեց Թորոսյանը։
Նախարարն անձամբ շահագրգռված է, որ իրավական ակտեր ընդունվեն, որոնք կարգելեն ծխելը հասարակական վայրերում։
«Ծխախոտային արտադրատեսակների օգտագործման բացասական ազդեցության նվազեցման և կանխարգելման մասին» օրենքի նախագիծը Հայաստանում խոշոր տուգանքներ է նախատեսում հասարակական վայրերում ծխելու համար։
Արգելվում է ծխախոտի վաճառքը և ծխելը հիվանդանոցների, պոլիկլինիկաների, սրճարանների, ռեստորանների տարածքներում, վերելակում և այլն, ինչպես նաև մանկապարտեզներից, դպրոցներից և բուհերից 100 մետր հեռավորության վրա։ Նշված վայրերում ծխախոտ վաճառելու համար նախատեսվում է 500 հազար դրամ, իսկ ծխելու համար` 200 հազար դրամ տուգանք։
