ԵՐԵՎԱՆ, 7 հունիսի — Sputnik. ՀՀ առողջապահության նախարար Արսեն Թորոսյանը Facebook սոցիալական ցանցում խնդրում է օգնել վերջ տալ մի շատ կոնկրետ արատավոր ու հանցավոր երևույթի։
«Հարգելի բժիշկներ, սիրելի գործընկերներ, խնդրում եմ ձեզ օգնեք մեզ վերջ տալ մի շատ կոնկրետ արատավոր ու հանցավոր երևույթի, որը դեռ առկա է մեր երկրի որոշ բուժհիմնարկներում»,- գրել է նա:
Նախարարը նշել է, որ վերջին շրջանում ստանում է անանուն ահազանգեր, որ որոշ բուժհիմնարկների տնօրեններ (կամ նրանց հանձնարարությամբ տեղակալներ և բաժնի վարիչներ) գումար են շորթում բժիշկներից կա՛մ ամսական կոնկրետ «նալոգ» դնելու, կա՛մ բժիշկների առանց այն էլ ցածր աշխատավարձը հետ պահանջելու միջոցով:
«Խնդրում եմ ձեզ, նման դեպքում նամակ գրել azdarar@moh.am հասցեով, բայց միևնույն ժամանակ խիզախություն և համարձակություն ունենալ տալ անուններ` թե՛ ձեր, թե՛ նման քայլերի դիմողների: Հակառակ պարագայում մենք և մեր իրավապահ մարմինները անզոր կլինենք ձեզ օգնելու հարցում»,- գրել է նախարարը:
Թորոսյանը նշել է` նման անձինք դեռ չեն գիտակցում, որ Հայաստանը փոխվել է և այդ արատավոր բարքերը տեղ չունեն նոր Հայաստանում:
«Ձեր օգնությամբ մենք «կհասկացնենք» նրանց դա: Մի վախեցե՛ք, խոսե՛ք: Մենք ձեր կողքին ենք»,- գրառումը եզրափակել է Թորոսյանը:
Նշենք, որ Թորոսյանը հունիսի 5-ին ԱԺ–ում խոսել էր պետպատվերով ծառայությունների մասին։
