ԵՐԵՎԱՆ, 7 հունիսի — Sputnik. Գրիգոր Գրիգորյանին որևէ մեկը չի հարցաքննել, առավել ևս նա որևէ հայտարարություն չի արել 2008 թվականի մարտի 1-ի իրադարձությունների վերաբերյալ։ Այս մասին հայտարարել է ՀՀ երկրորդ նախագահ Ռոբերտ Քոչարյանի գրասենյակը` մեկնաբանելով մամուլում հրապարակված լուրն այն մասին, թե Գրիգորյանին վերջերս հարցաքննել են, և նա կարևոր տեղեկություններ է հայտնել այդ իրադարձությունների վերաբերյալ։
«Այդ լուրը կարդալիս ինձ զանգահարեց պարոն Գրիգորյանը և իր վրդովմունքը հայտնեց նշված հոդվածի կապակցությամբ: Նա հայտնեց, որ որևէ հարցաքննության չի ենթարկվել և այդ թեմային առնչվող հայտարարություններ չի արել, առավել ևս` նման մտացածին ու կեղծ բովանդակությամբ հայտարարություն, որ վերագրվել է իրեն: Նույնիսկ մեծ ցանկության դեպքում նա չէր կարող պատմել իր և նախագահ Քոչարյանի հեռախոսազրույցի մասին, քանի որ երբևէ նման զրույց չի ունեցել»,- հայտարարել է Քոչարյանի գրասենյակի ղեկավար Վիկտոր Սողոմոնյանը։
Նա նշել է, որ այդ տեղեկությունը նախագահ Քոչարյանին ուղղված հերթական կեղտոտ հերյուրանքն է:
Նշենք, որ «Ժամանակ» թերթն այսօրվա համարում գրել է, որ վերջերս հարցաքննվել է Մարտի 1-ի իրադարձությունների ժամանակ ներքին զորքերի հրամանատար Գրիգոր Գրիգորյանը և հայտնել, որ ցուցարարների վրա կրակելու հրահանգը ստացել է այն ժամանակվա նախագահ Ռոբերտ Քոչարյանից:
«Ավելին՝ Քոչարյանը մանրամասն հրահանգավորել է, որ ցուցարարների վրա դիմահար կրակ բացվի և կիրառվեն նման դեպքերի համար արգելված հատուկ միջոցներ»,- նշված է հոդվածում:
Sputnik Արմենիան թերթի այս հրապարակման առնչությամբ զրուցել է փորձագետների հետ։ Քաղաքագետ Մանվել Սարգսյանը մեզ հետ զրույցում ասաց, որ Քոչարյանի հասցեին բավականին լուրջ մեղադրանքներ են հնչում, և անհնար է պարզապես անտեսել դրանք։
Միաժամանակ փորձագետը չի բացառում, որ Քոչարյանի հնարավոր քրեական հետապնդումը կարող է դոմինոյի էֆեկտ ունենալ։ Հաշվի առնելով, որ բազում բարձրաստիճան պաշտոնյաներ կապ են ունեցել մարտի 1-ի ողբերգության հետ, պետք է աղմկահարույց քրեական գործերի սպասել։
Հայաստանի առաջին նախագահի անվտանգության գծով նախկին խորհրդական Աշոտ Մանուչարյանն իր հերթին կարծում է, որ 2008 թվականի մարտի 1-ի ողբերգությունը Հայաստանի ֆունդամենտալ խնդիրն է։ Վերջին տասը տարիներին Հայաստանի բոլոր խնդիրները մարտի 1-ի ողբերգության հետևանքն են։
«Հիմա եկել է այն պահը, երբ այդ պատմությունը պետք է լիովին բացահայտվի։ Ու խոսքը ոչ միայն մարտի 1-ի մասին է, այլև` հոկտեմբերի 27-ի ահաբեկչության։ Ճշմարտության պահը եկել է, յուրաքանչյուր մարդ պետք է իր արածի համար պատասխան տա», — ասաց Մանուչարյանը Sputnik Արմենիայի հետ զրույցում։
Առաջին նախագահի նախին խորհրդականը կարծում է, որ պետության նախորդ ղեկավարներին պատասխանատվության առաջ կանգնեցնելու հարցում հիմնական դերակատարությունը պետք է կատարի հասարակությունը։
«Եթե այդ գործառույթները թողնենք միայն կառավարությանը, ապա այն օբյեկտիվ պատճառներով կաշկանդված կլինի իր գործողություններում։ Չի կարելի ամեն ինչ կառավարության ուսերին բարդել ու այն հարվածի տակ դնել, այդ թվում` դրսից հարվածի», — ասաց մեր զրուցակիցը։
Վերջիվերջո իշխանափոխությունը Հայաստանում կայացավ ժողովրդական շարժման, փողոցի ճնշման արդյունքում։ Անկախ այն բանից`իշխանափոխության արդյունքում պետական կառավարման ինչ մոդել կկառուցվի, այդ մոդելը կա՛մ ժողովուրդն է կառուցելու, կա՛մ այն ընդհանրապես չի կառուցվելու։
