ԵՐԵՎԱՆ, 7 հունիսի — Sputnik. Սյունիքի մարզը շուտով նոր մարզպետ կունենա։ Այս մասին այսօր խորհրդարանում վարչապետ Նիկոլ Փաշինյանը հայտնեց լրագրողներին։
Մարզպետների մեծ մասը փոխվել են, սակայն նախորդ իշխանության օրոք նշանակված Սյունիքի մարզպետ Վահե Հակոբյանն ավելի վաղ հայտնել էր, որ չի պատրաստվում հրաժարական տալ։
«Կարծում եմ` ակնհայտ է, որ առաջիկայում մենք կունենանք Սյունիքի նոր մարզպետ», — ասաց Փաշինյանը։
Հիշեցնենք, որ Հայաստանի 10 մարզպետներից 8-ն արդեն նշանակված են։ Արարատի նոր մարզպետ է նշանակվել Նոր Կյանք գյուղի համայնքապետ Գարիկ Սարգսյանը, Կոտայքի մարզպետ` «Քաղաքացիական պայմանագրի» վարչության անդամ, ծնունդով Տավուշի Չինարի գյուղից Ռոմանոս Պետրոսյանը, Տավուշի մարզպետ` Իջևանի գործող քաղաքապետ Վահե Ղալումյանը, Շիրակի մարզպետ` «Քաղաքացիական պայմանագրի» անդամ Կարեն Սարուխանյանը, Գեղարքունիքի մարզպետ` 2017թ.-ի ընտրությունների ժամանակ Գեղարքունիքի մարզում ՀՅԴ ռեյտինգային թեկնածու Իշխան Սաղաթելյանը։
Արագածոտնի մարզպետի պաշտոնում վերանշանակվել է իշխանափոխության արդյունքում հրաժարական ներկայացրած նախկին մարզպետ, ՀՅԴ անդամ Աշոտ Սիմոնյանը։ Վայոց ձորի մարզպետ նշանակվեց Արագած Սաղաթելյանը, Լոռու մարզպետ՝ Հրանտ Մարգարյանը:
