ԵՐԵՎԱՆ, 8 հունիսի — Sputnik. Երևանի ընդհանուր իրավասության դատարանի Շենգավիթի նստավայրում «Սասնա ծռերի» անդամ Արամ Պավելի Մանուկյանի խափանման միջոցը փոխվեց։ Նա նիստերի դահլիճից ազատ արձակվեց։
Մանուկյանի խափանման միջոցը փոխելու միջնորդությունը ներկայացրել է նրա պաշտպան Ինեսա Պետրոսյանը։
Ազգային ժողովի «Ելք» խմբակցության պատգամավորներ Ալեն Սիմոնյանը և Հայկ Կոնջորյանը անձնական երաշխավորություն էին ներկայացրել ՊՊԾ գնդի գործով ամբաստանյալ Արամ Մանուկյանի խափանման միջոց կալանքը փոխելու վերաբերյալ: Ավելի ուշ «Ծառուկյան» խմբակցության մի խումբ պատգամավորներ նույնպես անձնական երաշխավորություն էին ներկայացրել։
Դատավոր Արշակ Պետրոսյանը խորհրդակցական սենյակից վերադառնալուց հետո բավարարեց միջնորդությունը։
Մանուկյանը «Սասնա ծռերից» հինգերորդն է, որ ազատ է արձակվում։ Ավելի վաղ դատարանը փոխել էր նաև Արամ Հակոբյանի, Տիգրան Սարգսյանի, Հովհաննես Վարդանյանի, Արեգ Կյուրեղյանի նկատմամբ կիրառված կալանքի որոշումները։
