ԵՐԵՎԱՆ, 13 հունիսի — Sputnik. «Ելք» և «Ծառուկյան» խմբակցությունները հերթական անգամ տապալեցին Սահմանադրական դատարանի դատավորի ընտրությունը։ Առաջադրված միակ թեկնածու Ելիզավետա Դանիելյանը չընտրվեց։ Փակ գաղտնի քվեարկությանը մասնակցած 54 պատգամավորներից կողմ քվեարկեցին 36-ը, դեմ` 17-ը, 1 քվեաթերթիկ համարվեց անվավեր։ Այս մասին ընտրության ավարտին հայտարարեց ԱԺ հաշվիչ հանձնաժողովի նախագահ Գագիկ Մելիքյանը։
Նշենք, որ ընտրվելու համար թեկնածուն պետք է նվազագույնը 63 ձայն ստանար։ Սակայն «Ելք» և «Ծառուկյան» խմբակցությունները նախապես հայտարարել էին, որ չեն մասնակցելու քվեարկությանը։ Երեկ ԱԺ-ում Ելիզավետա Դանիելյանի հետ հարց ու պատասխանի ժամանակ երկու խմբակցություններ էլ հայտարարել էին, որ իրենց չեն բավարարել հնչած պատասխանները։
ԱԺ-ն արդեն երկրորդ անգամ է տապալում ՍԴ անդամի ընտրությունը։
Մայիսի 4-ին խորհրդարանը տապալել էր Էմիլ Բաբայանի ընտրությունը: Մինչ քվեարկությունը «Ելք» և «Ծառուկյան» խմբակցությունները հայտարարել էին, որ բոյկոտելու են ընտրությունը, ինչի արդյունքում Բաբայանը ստացել էր 51 ձայն։
