ԵՐԵՎԱՆ, 15 հունիսի – Sputnik. Րոպեներ առաջ կալանավայրից ազատ արձակվեցին «Իգլայի» գործով մեղադրյալ Արմեն Պողոսյանը, Սանասար Գաբրիելյանն ու Սամվել Բաբայանը։
Կալանավայրի դիմաց հավաքվածները Բաբայանին ու մյուսներին դիմավորեցին «Հաղթանակ» վանկարկումներով, շամպայնով ու գրկախառնություններով։
Մինչ այդ այսօր Վճռաբեկ դատարանը երեք մեղադրյալների նկատմամբ կիրառված խափանման միջոց կալանքը փոխելու որոշում էր կայացրել։
Վճռաբեկ դատարանն այսօր բեկանեց ԼՂՀ ՊԲ նախկին հրամանատար, Արցախի հերոս Սամվել Բաբայանի գործով դատավճիռն ու այն ուղարկեց վերաքննության։
Հիշեցնենք` ԱԱԾ-ն Բաբայանին ձերբակալել է 2017 թ-ին` «Իգլա» տեսակի զենիթահրթիռային համալիր մաքսանենգ ճանապարհով Հայաստան բերելու գործի շրջանակում:
Բաբայանը չի ընդունում իրեն առաջադրված մեղադրանքը, ըստ որի՝ նա նախնական համաձայնությամբ դրդել է մի խումբ անձանց ապօրինի կերպով ձեռք բերել «Իգլա» տեսակի դյուրակիր զենիթահրթիռային համալիր և այն փոխադրել Հայաստան:
