ԵՐԵՎԱՆ, 16 հունիսի — Sputnik. ՀՀ վարչապետ Նիկոլ Փաշինյանն աշխատանքային այցով է մեկնել Արցախ, Sputnik Արմենիայի հետ զրույցում նշեց վարչապետի խոսնակ Արման Եղոյանը։
«Աշխատանքային այց է, որի ընթացքում հանդիպումներ կլինեն, քննարկումներ։ Արտառոց որևէ բան չկա»,- ասաց նա։
Sputnik Արմենիայի հարցին, թե Փաշինյանի այցը որևէ կապ չունի՞ արցախա-ադրբեջանական սահմանին հակառակորդի կենդանի ուժի և տեխնիկայի կուտակումների հետ, Եղոյանը պատասխանեց. «Ես այցը չէի կապի դրա հետ»։
Նշենք, որ Փաշինյանը մեկ օրով Արցախ է մեկնել այսօր` հունիսի 16-ին։
Արցախի պաշտպանության նախարարության հրապարակած այսօրվա ամփոփագրում նշվում է, որ այս շաբաթվա ընթացքում հակամարտ զորքերի շփման գծի տարբեր հատվածներում նկատվել են ադրբեջանական բանակի կենդանի ուժի և զինտեխնիկայի տեղաշարժեր ու կուտակումներ:
Հունիսի 10-ին Արցախ էր մեկնել նաև ՀՀ նախագահ Արմեն Սարգսյանը։