ԵՐԵՎԱՆ, 17 հունիսի — Sputnik, Նելլի Դանիելյան. Ռուսական հսկիչ մարմինը` Ռոսսելխոզնադզորը, հունիսի 15-ին հայտարարություն տարածեց` հայտարարելով, որ արգելում է իր երկիր կապիկներ ներմուծել Հայաստանից: Ժամանակավոր արգելքը հիմնավորվում էր նրանով, որ Հայաստանից պրիմատներ դուրս բերելիս, փաստաթղթային և ֆիզիկական ստուգման ժամանակ բազմաթիվ խախտումներ են բացահայտվել: Թե կոնկրետ ինչ խախտումների մասին է խոսքը, ռուսական կողմը չի մանրամասնում: Ուստի Sputnik Արմենիան փորձեց ճշտել, թե երբ ու ինչ կապիկներ են վերջին շրջանում Հայաստանից արտահանվել Ռուսաստան ու այդ հարցով դիմեց ՀՀ պետեկամուտների կոմիտե:
Մեզ տրված պատասխանից պարզ դարձավ, որ նման մաքսային գործողություն վերջին անգամ պաշտոնապես գրանցվել է շուրջ 1.5 տարի առաջ:
«01.02.2017թ. «ԶՕՕ Ֆաունա Ատր» ՍՊԸ կողմից ՌԴ է արտահանվել 3 հատ կապիկ` 48000 դրամ վիճակագրական արժեքով»,- նշված է ՊԵԿ-ից ստացված գրության մեջ:
Թե ինչու է ռուսական կողմին ավելի քան 1 տարի անց անհանգստացել կատարված գործարքը, դժվար է ենթադրություններ անել, բայց փաստ է, որ նշված ընկերությունն այնքան էլ «մաքուր» համբավ չունի:
Էկզոտիկ կենդանիների առևտրով զբաղվող «Զօօ ֆաունա արտ» ՍՊԸ-ն 2009թ-ին հիմնադրել է Արթուր Խաչատրյանը: 2014թ-ին նրա նկատմամբ մաքսանենգության կասկածով քրեական գործ է հարուցվել: Միևնույն ժամանակ հայ գործարարի նկատմամբ միջազգային հետախուզում է հայտարարվել: Խաչատրյանը հայտնվել էր Ինտերպոլի ուշադրության կենտրոնում, քանի որ աֆրիկյան երկրներից ապօրինի կենդանիներ արտահանողները, որպես կանոն, կենդանիների վաճառքով զբաղվող «դիլերներ» են: Իսկ Արթուր Խաչատրյանը նրանց հետ գործնական հարաբերություններ է հաստատել:
Խաչատրյանի միջոցով Հայաստանն այդ տարիներին դարձավ կենդանիների, այդ թվում նաև` կապիկների առևտրի տարանցիկ երկիր: Այդ տարիների մամուլի հրապարակումների համաձայն` Արթուր Խաչատրյանի գործունեությունը վտանգավոր էր նրանով, որ Հայաստան ներմուծված կապիկները անօրինական ձևով էին բռնել վայրի բնությունից և պահվում էին ոչ պատշաճ կարանտինային պայմաններում և կարող էին տարբեր վարակների փոխանցման պատճառ դառնալ:
Բայց 2016թ-ին Խաչատրյանի նկատմամբ հարուցված քրեական գործը 2 տարի ՀՀ պետեկամուտների կոմիտեի քննչական վարչությունում քննվելուց հետո կարճվեց` Քրեական օրենսգրքում փոփոխությունների արդյունքում մաքսանենգության հոդվածն ուժը կորցրած ճանաչելու հիմքով:
Իսկ թե կոնկրետ ինչ կապիկներ են Ռուսաստանի պատկան կառույցում իրարանցում առաջացրել ու մեր երկրի նկատմամբ հերթական արգելքի առիթ դարձել, Sputnik Արմենիան կփորձի պարզել արդեն ռուսական կողմից:
