ԵՐԵՎԱՆ, 18 հունիսի — Sputnik. Պետական վերահսկողական ծառայության պետ Դավիթ Սանասարյանը ֆեյսբուքյան իր էջում հայտարարել է, որ 1–ին գործողություններն իրականացնելու են ՀՀ ՊՆ–ում։
«Ի պաշտոնե հայտարարում եմ, որ վերահսկողական առաջին ու հիմնական լիազորությունները պետական վերահսկողական ծառայությունը իրականացնելու է ՊՆ-ում»,–գրել է նա ու ԱԱԾ–ին ու Ոստիկանությանը խնդրել շատ արագ պարզաբանեն հանրության այն մտահոգությունը, թե «Զինվորի բաժին» պիտակով պահածոներն ինչպես են հայտնվել Մանվել Գրիգորյանի կենդանիների պահեստում։
«Բոլոր մեղավորները պետք է պատժվեն օրենքի ողջ խստությամբ։
ՊՆ-ից գողացած ամեն մի չոփի համար պետք է պատասխանատվության ենթարկվեն. գեներալ չէ ով ուզում է լինեն։
Հ.Գ. Դուք պատկերացնո՞ւմ եք էդ պահեստը երկու տարի մաշվել է ու մնացել է էն ինչ տեսանք»,–գրել է Սանասարյանը։
Հիշեցնենք, որ հունիսի 16-ին Էջմիածնում ԱԱԾ աշխատակիցները ձերբակալել են ՀՀԿ խմբակցության պատգամավոր Մանվել Գրիգորյանին ու տեղի քրեական հեղինակություն Արթուր Ասատրյանին, որը հայտնի է «Դոն Պիպո» մականունով։ Երկուսն էլ կասկածվում են ապօրինի զենք-զինամթերք պահելու մեջ։
Քրեական գործը հարուցվել է ՀՀ Քրեական օրենսգրքի 235-րդ հոդվածի (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) 2-րդ մասի հատկանիշներով։
Ավելի ուշ ՀՀ ԱԱԾ-ն հրապարակել է Մանվել Գրիգորյանի առանձնատան հետախուզության տեսանյութը, որտեղ երևում էր, թե ինչպես է գեներալը յուրացրել զինվորներին ուղարկված օգնությունը: Հայտնի դարձավ նաև, որ նա ահռելի քանակությամբ ապօրինի զենք-զինամթերքի է տիրապետում: